كسرات

[ألمحيط]

عقب اثر في حياتك زين = من بعدك الناس ما تنساه
ولا تكون ممن عملهم شين = لا غاب غابت معه ذكراه
=
عطرت حرفي بدهن العود = والفل والورد والكادي
ونظمت فيه المعاني عقود = من فيض فكري واعدادي
واهديتها والحنين يزود = لأغلا المحبين وودادي
اللي لهم بالفؤاد وجود = ولا غيرهم ساكن فؤادي
=
كسر الخواطر صعيب وشين = يبقى على القلب تأثيره
وإللى تترجم بدمع العين = واقع ولا لي عنه خيره
=
يوم اشرقت واستنار الكون = نجم السعد بان وافرحنا
وشفت المودين ليا عون = وعهد الشقا راح وارتحنا
وصارت دروب المصاعب هون = ولا عاد الأيام تجرحنا
ونعيش الأفراح طعم ولون = كلما اغربت شمس واصبحنا
=
جمعت قطر الندى بيدى = اللي تساقط على الاوراق
وشفت به طيف حبك حى = وكل يوم اشوفه مع الاشراق
=
روض المحبه عبير وفاح = محلا شذى ورده الجوري
اللي غصب يسلب الأرواح = وأنا يأثرعلى شعوري
=
نجم السما الخالق معليه = ومنازله حيل علويه
اسهر معه ليل واناجيه = باسرار قلبي وما بيه
وعليه هجر الحبيب اشكيه = اللي له اليوم حوليه
ولا عاد اشوفه ولا راعيه = ولا ادري وش اخلف له النيه
=
روحي جرحها عديم احساس = وعكر صفا جوها كله
آسي ويرضى علىّ البأس = من سؤ طبعه ومن غله
=
محلاك نهرك عذي صافي = عذبه مراويه للمشتاق
راهي وفيه الروى وافي = يطفي وهيجي من الأعماق
واسير له والقدم حافي = مايهمني لو طريقه شاق
كله لجل خاطر اولافي = اللي لهم ود فالخفاق
=
ياليل كلك شجن واسرار = ابغاك مستودع أسراري
بيني وبين العيون ستار = مسدل على دمعي الجاري
=
اخايل البرق بمزونه = اللي تلامع جنوب وشام
واشاهد الود بعيونه = يبرق ويرسل علىّ سهام
والوصل محجوب من دونه = مبعد ولالي عليه ليام
لكنها الروح مجنونه = لعل من لامها ينلام
ولا يلجلج النوم بعيونه = ومثلي يذوق السهر ماينام
يناجي الليل وسكونه = لا عطف يلقى ولا استرحام
=
برق الحيا من جبينه لاح = وقلت حييت يا البارق
ياللي معك للفرج مفتاح = يطفي لضى شوقي الحارق
الروح من حقها ترتاح = لا شاهدت نوره الشارق
اللي منه طب للأرواح = وبينه وبين البشر فارق
=
راشد
اللي تربى على المقدار = وطيب التعامل مع اصحابه
يحرص على صحبة الأ خيار = ولا يصك من دونهم بابه
امير الكسرة ناصر الحجوري
لاّ هنت ياراشد الاشعار = ياحافظ القدر لاربابه
مال الردي فالوفاء مندار = لاّ يغرك بنبرة خطابه
=
من مبدئ من صغر سني = رفعت نفسي عن الزلات
حتى الخطا لو بدر مني = اندم واحاسب عليه الذات
=
عبره بالأعماق محبوسه = من خوف تكشف خفايا الذات
اللي لها سنين محسوسه = واعيشها معظم الأوقات
=
تغافلي عن كثير اشياء = عن عمد ما هو جهل مني
اقدم الصفح والإعفاء = واعيش راضي ومتهني
=
مهما حكوا ما اصدق فيك = والشك ما يساور اضنوني
واغليك واغلي الذي يغليك = واهل الحكي ما يهموني
=
بكيت وابكي وازيد بكاي = على الذي فارق احبابه
غصبا عليه ما هو برضاي = رضيت فرقاه وغيابه
رغم ان وده بوسط دماي = واعيش ذكراه واحيابه
يالله يا مستجيب دعاي = في جنة الخلد احضابه
=
معذور بعض البشر لو غار = او بين الحقد في قلبه
يجني على العالمين اضرار = ويحسب الناس تجهلبه
من يوم يومه ردي غدار = شيطان فكره تمثلبه
ولا حد يعده من الأخيار = من حقده اللي تغلغلبه
=
بيني وبينه بحر وبرور = ماهو قريب على جالي
واصبحت اناجي شعاع النور = من شوق قلبي على الغالي
==
انا على العهد والميثاق = اللي فرضته على روحي
ما نساك لو ضاقت الآفاق = ولو انها تنزف جروحي
=
يا دموع يا حايره هلي = حتى لوانه حرقني ماك
ومن طاقتي ما بقي ملي = ولا عاد يبقى صبر وادراك
احسني مضطرب كلي = ما غير افكر بذاك وذاك
من هم بالقلب حاصللي = عايش معه في الم وارباك
=
نوبة بكى قطعت كبدي = جتني على غير عادتها
واخفي غصب عكس ما ابدي = واقاسي امرار حرقتها
==
تجدد الجرح بالخفاق = اللي نعاني من الامه
وصابر ومخفيه بالأعماق = وخاضع تحت رحمة احكامه
اشكي الى ربي الخلاق = مدبر الكون بنظامه
يلطف بحالي وانا مشفاق = عايش و الآمال قدامه
=
بعض البشر مظهره مغري = لكن سمه بنيبانه
راعي حيل ما يجي دغري = والصدق ماهو على لسانه
=
حزين وابكي على الماضي = اللي بعمر الصبا عشناه
والكل منا عنه راضي = ومهما الزمن دار ما ننساه
=
احيان ماهي على كيفك = ولا تجي حسب ما تبغاه
تسبق سيوف العذل سيفك = وكم اخلفت حي عن منحاه
==
اشكي الم داخلي مقواه = بعثر حياتي وشتتها
ومن لا يجرب لهيب الآه = معذور ما حس قسوتها
=
ما كان فيك العشم تنسى = كل الذي بيننا من ود
حتى معي بالهجر تقسى = وتقطع مواصيلنا وتصد
=
يا ويل قلبي عجزت انساه = وده تعمق بوجداني
ولا يغيب طيفه ولا ذكراه = وطاريه ما يفارق لساني
=
استوطنت في خفايا الروح = نبرة حزن واستحلتها
لما معي بالحديث يبوح = اسمع صداها ونبرتها
=
من علمك تجرحيني جرح = يبقى بقلبي الجريح سنين
اللي عطاك الهنا والفرح = اليوم ينزف قهر مسكين
=
ما ندم على خير سويته = من يعمل الطيب له منزال
وياكم راعي وفا اوفيته = واوفاني الكيل والمكيال
لكن الذي ما تمنيته = اني ارا النقص بالرجال
اللي حشمته واغليته = ويجازي الطيب بالبطال
=
انا اعرف الوقت والتاريخ = وادري عنه ليش متغير
يحسب وصل راسه المريخ = ماعد نشوفه ولا يسير
=
كنت اسبق الريح من قدي = وكل المصاعب احطمها
واليوم كل شي وقف ضدي = يالله جروحي الملمها
=
تسلل الياس في روحي = من كثر صدك وتعذيبك
وتشوفني تنزف جروحي = وتبخل علي بتطبيبك
=
فوسط قلبي زرعت الحب = جناينه مرتع احبابي
لان قلبي عطوف محب = والحب طبي ومطلابي
=
حاولت اغير من اطباعي = لجل ارضي الناس واكسبهم
لقيت قلبي ورا اضلاعي = قفل عليهم وكذبهم
ويقول يكفي من اخداعي = ومذهبي غير مذهبهم
بعض البشر مالهم داعي = خسران من كان صاحبهم
=
اعامل الناس بالطيب = واقول بكره يطيب الحال
والقى الأسيه من قريب = تحطم القلب والآمال
=
عشان ما جرح حبيب الروح = اللي من الناس حبيته
لا شفته اضحك وانا مجروح = وجرحي بالأعماق داريته
==
تقاعدي عالورق رسمي = والا الحقيقه الم واجراح
من يوم سار السهر قسمي = صفو الليالي علي راح
=
جرح القلوب العطايب ذنب = من حي آسي ولا يداري
دايم عن الناس منحي جنب = ماهو على ودهم ضاري
=
دكتور ما للهوى ترياق = عن سمه اللي سرى فينا
وشدة الشوق والارهاق = وجروحنا من محبينا
=
عيني بكت مع غروب الشمس = من شوق روحي على احبابي
و تجددت ذكريات الامس = وبينت سدي الغابي
=
طيف السنين الخوالي ذيك = لامربيا يذكرني
وعيني ياذاك الزمن تبكيك = واجمل لياليك تحضرني
=
اميل للصمت والعزله = وافضل اكون مع ذاتي
مبعد عن الناس في نزله = اقضي بها معظم اوقاتي
=
انا اصدقائي من الا خيار = والصدق طبعي ولي مبدا
مثل الذهب صافي المعيار = لا يقل سعره ولا يصدا
=
دمعه على وجنتي هلت = وترجمة حس وجداني
من آه زادت ولا قلت = كأنها النار تصلاني
حلت بالعماق واحتلت = من حال واقع تحداني
كايد وروحي منه ملت = كلما انتهت عودت ثاني
==
اواه ياقلبي المجروح = عانيت جلطه ورا جلطه
من اول اقدر اجي واروح = واليوم ماستحمل الغلطه
=
مااخطيت في حقكم ماخطيت = ولا يجيكم خطى منى
كملتكم بالوفى واوفيت = وجاملتكم قدر ما امكني
ويشهد على الحال رب البيت = اللي عليكم مأمني
مايوم عن وصلكم صديت = ولا يتغير بكم ضني
=
رسمت صوره من الماضي = وصوره حديثه من الحاضر
اللي معي طيفها ياضي = ويسرني كل ما اناظر
واليوم كسبي ومعواضي = لاشفتها روضها خاضر
اكون عن حاضري راضي = ومناظره تسعد الناظر
=
من شافني قال ذا مرتاح = والقلب مجروح ويعاني
معذور ما جرب الاجراح = ولا يعرف احساس وجداني
وكثرة انيني مسا وصباح = من جرحي اللي تحداني
اللي سوات الجبل ما انزاح = كل يوم اراعيه باعياني
=
يا ود صدك يعذبني = لما تغير بدون اسباب
والقاك دايم تعاتبني = وتاخذ موده بدون حساب
ومشاعري فيك تغلبني = ولا افتح معك للمعاتب باب
رغم ان قلبي يحاسبني = ولا عاد يقوى جفا وعتاب

=
واحه من الورد والريحان = منظر زهرها عجيب وصوف
طرفي على شوفها ولهان = ولشوف ذيك الجبال النوف
=
اوصيك يا نجم يا ساري = اللي معك دائما مسراي
خبر محبي عن اخباري = وعن شوق قلبي وكثر بكاي
=
اكبر خطا تعمل المعروف = في حي ما يقدر احساسك
يجري ورى حاجته ملهوف = واذا انقضت عاف مجلاسك
=
من بعد افل نجمه الوهاج = اللي تعلى بآفاقه
من وين احصل نجم وسراج = وامتع الروح باشراقه
=
الناس ماهم سوى واجناس = ولا تغشني نظرتي فيهم
الله وهبني لهم مقياس = اختار منهم وانقيهم
=
ياحظ من يتقي ربه = ويخلص معه بالجهر والسر
يزرع ويحصد ثمر حبه = ومعه اتزان الحياة يقر
=
بعض البشر طبعهم مكشوف = وقلوبهم مالحسد حره
عنهم جعلت الوصل مصروف = ولا تشوف عيني بهم سره
طلعوا عن الواقع المألوف = اللي نظام الوفا قره
ولا بهم للصديق سعوف = ولا بهم خير بالمره
=
ما للصقر بالسهل مسكان = دايم وهو منزله عالي
ما يقبل الدون مهما كان = مرفوع قدره من الوالي
=
الله من هم وسط القلب = زايد لهيبه ووهاجه
من حي هجره سلبني سلب = واقفى وانا كنت محتاجه
=
قلبي مثل مسرح الاحداث = دمعي يترجم لك اخباره
والآه خلدتها ميراث = في عالم الصمت واسواره
=
اترجم الحرف بلساني = واختار معناه واسلوبه
مايختلف فيه ميزاني = واعطيه حقه ومطلوبه
=
وفردموعك لذاك اليوم = وصون الوفا قبل ما تندم
ويلحقك مما عملته لوم = وتبكي بدال المدامع دم
=
طبايع الناس مختلفه = والفرق مابينهم شتان
قلوبهم غير مئتلفه = لو انهم فالحقيقه اخوان
==
هيا استعدوا لشهر الخير = واستبشروا خير بايامه
واحد شهر بالسنه لاغير = ياحظ من قام بصيامه

راشد الجمعان ( المحيط )