آآه يقول من يهوى ركوب المسرجـات
لاجيب طـاري للسيـوف وسلّهـا
ياسامعـي والاولـه مـن الاولات
تنبيك عـن باقـي علومـي كلهـا
ترى حلاة الشي لاجالـه طـرات
واللي تجي في حلهـا فـي حلهـا
شبّـه وبـرّاد وثـلاث مهـيّـلات
هاذيـك اركدهـا وذيـك ازلـهـا
فلة حجاج وطيب راس وطيب ذات
ياقلهـا فــي وقتـنـا ياقلـهـا
في ذمتـي ذمـه كـأن المفـردات
تصيح باسمي يابن عـارج سِلّهـا
والله لعديهـا حــدود النايـفـات
مادمت اميّـز دقهـا مـن جلهـا
والكلمه اللي جات مدري كيف جات
زلّه وشرهتهـا علـى مـن زلّهـا
ياللي تقول النوم أخير من الصـلاة
شوري عليك أد الفروض وصلهـا
يامل قلبٍ بيـن ود وبيـن هـات
والعين من كثـر السهـر ياملّهـا
لاجيت بانسى واعتبر مافات مـات
استرجع افكـار الحـزن واحتلهـا
وابكي على الفرقا ولكن في سكات
ماهوب شرط ان الدمـوع أهلهـا
عليك يانبضي ويـا سـر الحيـاة
ياللي غلاهـا عَزهـا مـا ذلهـا
شيخة بنات وعلّمـي كـل البنـات
سبحـة غلانـا مانويـت أفلـهـا
مالك غنى عني وانا مالي غنـات
والحاقـده منهـم تمـوت بغلـهـا
انتي صفاتك غير عن كل الصفات
اضيـع فيهـا لابغـيـت ادلـهـا
ريقك عسل واساوره سكـر نبـات
وشفـاك ماتبخـل عليـه بظلهـا
لبّى البراقع والغطـاوي والعبـات
يازين سكبتهـا ومصعـب شلهـا
عندي ثلاث اشياء في قلبي ثبـات
والله مااخليهـا لاقـالـو خلـهـا
شوفك وشوف الما وممشى فالنبات
لاخيرونـي قلـت أبيهـا كلـهـا
ـــــــــــــــــــــــــــــــــــــ
|