[نسيم السروات]

شكل مافيه أحد عنده مشاركة تذكر الكل متهرب من الصور مايبون يصورون طعامهم

حتى أنا عندي صور كثيرة ولكن عندي مشكله في جهازي الأب مدري وش بلاه ماعد يسقبل بلوتوث من

الجوال بكرة اصلحة وأنزل كل الصور اللي عندي . وبعدين مو مهم الصور إحنا نبي مواقف طريفه

مواقف أخرى حتى لو كانت حزينة ومؤثرة وفيها عبره للغير مو مشكلة .

المهم اللي يبي يشارك الله يحيه واللي مايبي الله يستر عليه أنا بتولى هذا الموضوع بنفسي

بلي أقدر عليه من مواقف وصور إذا تيسرت .

موقف ظريف :

قبل أمس صليت الفجر وكان عندي شغل في المطبخ وجلست أسويه وبعدما خلصت التفت على الطاولة وشفت

عليها ترمس القهوة ورجعت المحبخ وأخذت معي فنجان قهوة وصحن رطب وقلت في نفسي أبي اتقهوى قهوة

الصبح قبل ما أنام وصبيت فنجاني وفتحت الللاب توب حقي أبي أتصفح وجاني ولدي وجلس جنبي على الكنب

وشاف الوضع مو تمام فيه شي غريب وكان منحرج يقلي شي ما يدري وش السالفه بادرته أنا وقلت له تبي أصب لك

واحد من القهوة ؟ طالع الولد فيني وهو مستغرب وقال لي يمه أنتي مو صائمه ؟! فشهقت شهقة من الخوف

وقلت لولد حراااااام عليك ليتك سكتت يمكن الله يبي يطعمني . وأنا كنت أمزح ولكن الولد تأثر من كلمتي وقال ياليتني

يايمه ماتكلمت وخليت ربي يطعمك لكن أنا غبي وأخذ يوبخ في نفسه فأكدت له أني كنت أمزح معه بل العكس قلت له كثر

الله خيرك أنك نبهتني قبل ما أتهور وأشرب .


موقف أخر :


في أحد ليالي رمضان أنعزمنا للفطور عند أحد أخواني فقلت لهم أنا علي القهوة والشاهي وحلى القهوة

المهم وضعت قهوتي تطبخ على النار ورحت أقضي بعض أشغالي وعندي شغالة جديدة باقي ما تعرف

خوقها من بوقها قامت على القهوة ووضعت فوقها 2 فنجان سكر وما قالت لي شي جيت أنا وحطيت عليها

الهيل ووضعتها بالترمس وذهبنا للعزيمة قالت زوجة أخي قهوتك يانسيم لا يعلى عليها خليها للرجال وإحنا

يالحريم نشرب أي قهوة ثانية قلت تم وفجئة تعالت الأصوات في مجلس الرجال ينادون يافلانه ياعلانه يا يا دخلت عليهم

مافيه أحد غريب قلت خير وش فيكم قالوا من سوى هذه القهوة قلت أنا سويتها وأنا أشعر بالفخر وأنتظر

كلمات الشكر والثناء قال واحد منهم هل ذقتيها قبل ما تجين بها قلت لا كنت صائمة كيف أذوقها بل شفتها زينه

في الفنجان وشفيها ؟! قالوا قهوتك حالية كلها سكر لكن تصدقين والله أنها لذيذه هل أنتي قاصدة ولا أيش الهرجة .

جلسنا نشرب فيها وما فهمنا عليها هل هي قهوة أم قشر محلى .

وخبرتهم أنه مقلب غبي من الشغالة .


ذوقوا القهوة العربية بالسكر والله حلوة .>>>> ترقعها .





إلى اللقاء مع مواقف أحلى وأحلى .