[الشغموم]

قصيدة من نظمي واتمنى ان تحوز على اعجابكم

دلهم الليل بْسواد وذعذعت نود الشمال
قلت همي يا حياتي ما حملتيه انثريه
قالت انثره اتّمنى فكني يا ولد الحلال
اسود الما عزتالك من زمانك ترتويه
لوم غيري لا تحط اللوم فوقي والجدال
الزمن غدار ما يفهم عليه انبه نبيه
يا زمان اقشر عطيتك ما طلبته من حلال
ما دريت انك كذوب والحبل تلعب عليه
الصبر ما عاد ينفع والعواقب الاحتمال
لو صبرنا واحتسبنا ما ضمنّا ما نبيه
من يقول ان العلا من يطلبه يسهر ليال
لو صحيح اللي يقوله ما طلبناه انْحضيه
انعقد سحر النحاسه واندفن تحت الرمال
تيه انا يا عونة الله في زماني تيه تيه
لو نصيت اللال كني ناصي العذب الزلال
ما تحس العين فرق و ما تشوف الا الشبيه
كود غرشوب(ن) خذاني بالجمال وبالدلال
غرنقي جذاب شرح وصار كلي مهتويه
ذاك لا منه همس لي بنّ بعودي وهال
منه احس بْنشوة (ن) تنعش فؤادي واتْحييه
أبعدوبه عن حياتي والهجر يا ناس طال
وابتدى درب الشقى من حيث مانا منتهيه
له ثلاث سنين واكثر عن وليفه ما يسال
وارتفع خشمه علي وقلت مانا مرتجيه
مير تبقى صورته تظهر يميني والشمال
ما قويت آصد عنه ولا قويت اقرب واجيه
حسبي الله عالمظاليل المزاريق النبال
موتي ارحم من جواهن يا عذولي يالسفيه
قمت اسال اهل الهوى وش حيلتي في ذا المجال
قالوا انسى ما عشقته والهوى من سار فيه....
ضاع ما بين التلاقي والتجافي والخيال
والتحيّر في مداوى جرح ما يقدر عليه
تحرق الزفرات صدري والحنايا فاشتعال
والقنابل في خفوقي فجّرت واسمع دويه
خايف من المغربيه والشفق وقت الزوال
وخايف الديجور عقبه ما يجي صبح (ن) يليه،،،