( 7 )
فاتن تحبيني ..؟!
إذا قلتي نعم ( طاح الحطب ) ..!
ماهو عتب
بس الشوارع كلها تسأل عليك ...
يانايمة عن شوق لوّح للنهارْ ..
قومي نحب ..
الدرب في صوتك مدار ..
والوقت حبْ .. !
حلمك بخيلْ .. وآخره جيتك وَله ..
ليلك طويل .. وكنت لك من أوَّله
يا نايمة ..
يادايمة ..في بال شاعر ماينام ..
فيك السلام وصوتك يربي الحمام ...!
هيامعي ..
كل الشوارع تسأل عيوني دموع ..
فيني رجوعْ ...
لأول الليل الحنونْ
لبحَّة انفاس السكونْ .. بآهتك
فاتن تحبيني
إذا قلتي نعم ..
خلّكْ على كيفك ... ( ونامي براحتك ) ..
فاتن تحبيني ..؟!
إذا قلتي نعم .. زاد الحكي ..
لو نشتكي ..
من وحشة الدنيا .. وذنب الطيبين ..
ضج الحنينْ ...
وصار صوتي ليلكِي ..
فاتن صباح الحب والورد الندي ..
لا يا بعدي .. !
لاتجزعينْ ..
كل السنين ..
اللي تبقّتْ .. فرحة الوقت الحزين
يَدْكِ افــ يدي ..
فاتن .. سمعت ببحتكْ همَّ الفرحْ ...
لو ينجرحْ ..
طيب .. ويغدربه صديق .. !
لازم تضيق ..
لـ اكنّْ صدري فسحة عيونك وطن ..
فاتن تحبيني ..
( 8 )
فاتن تحبيني ..!؟
إذا قلتي نعم وش ننتظرْ ...؟!
ودي أكحّل بك عيون الأغنياتْ وأنتفضْ ..!
لو ينشطر ..
حرفي وحرفك .. كلنا صرنا بَعَض ..!
فاتن .. مساك انتي لحالك والصديق المنبهرْ ..
كل الحياة مهاجرةْ .. في غيبتكْ ..إلا الشعر ..!
لكنك أكثر من قصايدنا .. وأعذب صوتنا ..
كنك سحابة والمطر فيها أنا ..!
فاتن .. مسا صوتك حزين ويعتذر ..!
كن الصدى ْ .. من غير ضحكة صوتك الغض انكسرْ ..!
لاتعتذرْ .. لاتنقهرْ ..
ياصوتها يااجمل قصايدنا جميع ..
يا بيتها .. يا أول عصافير الربيع ..
فاتن تحبيني ..
إذا قلتي نعم .. ( وشلون أضيع ) ..! ؟
( 9 )
فاتن تحبيني ...
وتاخذني سنين الذكرياتْ ..
وشلون مرّت .. قبل ما اشوفك معي ...
فاتن تحبيني ؟!
إذا قلتي نعم .. هيا اسمعي ..!
لوقت فغيابك مدى ..
والصوت من بعدك صدى ...
وآنا ثقييل ..!
يا طيّبة ..
ياقريّبةْ ..
يا ساكنة روحي بحلم المستحيلْ ..!
قصّرت بك ليلي .. وطوّلتكْ حنانْ ..
ما هو ( جنانْ ) ..
انتي الامان .. ْ
بس العيون اللي تعّدتنا.. أذى ..!
أبغى انثر إحساسك شذى ..
وأبغى أسافر بك بعيييييدْ ..!
ياللي تحبيني .. ورا حزني العنيدْ ..
قومي اسمعي ..
فاتن تحبيني ..؟!
إذا قلتي نعم ..خلك معي
( 10 )
فاتن تحبيني ؟!
وتسحب لحظة غيابك من لساني كلام ..!
قلت لصديقي ..
فاتن احساس المدينة بالسلام ...
متكوّتة من كل شيء ..!
من شعري الدافي .. ومن رعشة يدي..
من اسمي ( الوافي ) .. ومن حرفي الندي ..
من طينها .. من زينها ..
من جسمها .. من اسمها ..
من صدفة الأقدار في ضحكة ( غدي ) ..!
0
0
0
فاتنْ ..ترى سولفت عن وجهك كثير ..!
لما .. سألني : ( هي جميلة ؟ ) كنت اقول :
( حتى القمر ..
غابت عنه نصف الشهرْ ..!
فيني قهرْ
لو شافها .. يخسف .. وينتابه ذهول )
0
0
0
فاتن تحبيني ؟!
إذا قلتي نعم .. بـ يفتّح النوّار في كل الفصول ..!
(11)
فاتن تحبيني ..
إذا قلتي نعم هاتي يدِكْ
أبسعدِكْ ..
وشلون ..مثلك نقدر إنا نوعده
وشلون واحساسي هديّة مولدُه ..؟!
( تيّب ) ..
أقول شلون اسافر بك بعيد .. لأول أطراف السما
نشرب ظما
نعطش شجون وذكريات ..
ونشتري ( تلّة ) فرح ..
والا أقولك ..
بيت في غيمهْ .. وواجِهْته ( قُزح ) ..!
هاتي يدِكْ
يااارب .. وشلون أوعدِكْ ..
إني بسافر بك حياة ..
وانك لإحساسي مداه ..
وانك ( وأنا )
نسمة هنا
فاتن تحبيني إذا قلتي نعم ..
صرنا ( هنا )
(12)
فاتن تحبيني ..؟!
وكانت ( لخمة ) الشارع حضورْ ..!
صار المكان بضحكتك .. عذب العبور ...!
إن قلت أحبك .. صار حبك ( تمرة ) الصايم ..
وتاريخ الشعور ..!
لاتحاولين .. !
تدرين قبل الليل .. عن سر الفتور ..!
فاتن تحبيني ..
سألتك من زمان وما تحرَّيت الجواب بــــــــ..ـربكتي ..!
يمكن بغيت أفتح معك باب الحكي ..!
ويمكن لقيتك أكبر من البوح لاصرتي معي ..
قومي اسمعي :
يا ظالمة في فتنتك ..
يا نايمة في رقتكْ ..
وش أحتري
ما ابغى ( اشتري )
أبغى فطوري رفقتكْ ..!
فاتن تحبيني ..
إذا قلتي نعمْ .. يكفيني أفطر ضحكتكْ . ..!
( 13 )
فاتن تحبيني ..؟!
ويجمعنا حنان ..
ابسمعكْ ..
لو المكان .. اللي انوصف في آهتكْ ..
والا حكايتنا زمانْ .. اللي بغلطة فاتِتكْ ..
صارت أمانْ ..
يمكن حضنتك .. وابتدى عمري معكْ ..!
يا فاتنة ..حد الجنون
يالابسة ثوب السكونْ ..
ابغى اسكنك ..وابغى احضنك .. وابغى اتبعكْ ..!
ظلك طويل وليل شوقي يلحقه ..!
( هذا الشقي !
ابغى اخنقه..! )
فاتن .. من الليلة بقي ..
ذوْبَ الكلام ..
فيني سلام ..
فيني ( بَعَض عشق الحمام)
0
0
فاتن تحبيني ..؟!
إذا قلتي نعم داخ الظلامْ ..!
(14)
فاتن تحبيني ..
إذا قلتي نعم .. لا تسكتين ..!ّ
قولي تعالْ ..
فيني حنينْ ..!
الوقت فــ...ــغيابك دهرْ
والنوم من بعدك سهرْ ..
فاتن تأخَّرتي .. وفالشارع زحامْ..
صمتكْ حرام ..!
مدي يدي لليل .. صايم سفرته صوتك .. قبل وقت الغروب ..!
كل الدروب ..
اللي مشيناها سوى
واللي عرفناها هوى .. كانتْ شحوبْ ..!
فاتن ..
وما غيرك طريق ...!
فيني صديقْ..
ودي أسولف لك عن احساس الحياة بغيبتكْ ...!
وودي تشوفين اش كثر اصووون باحساسي .. وفاك وطيبتكْ ..!
فاتن تحبيني ..
اذا قلتي نعم لاتسكتين
انا ..بعَد فيني حنييينْ ..!
لـ المذهل ..
ابراهيم الوافي