[حسين المعنى]

[poem=font="Simplified Arabic,6,black,normal,normal" bkcolor="transparent" bkimage="" border="none,6,gray" type=2 line=0 align=center use=ex num="0,black""]
قال المعنى حسين القلب ميت في هوى الزين=من يوم ربي خلقني كل مابي ينتحيله

سوات وادي من المنشى توارد فيه سيلين=الاول انحاه والثاني تبع ميلان سيله

ماغيره اللي تمنا في حياتي شوفه العين=اغليه واقدره واسهر عشانه كل ليله

له منزله في عيوني حجمها اكبر من شداوين=اكبر وتكبر ولا تحسب لعدلاتن وميله

رست بقلبي وطاحت به كما طيح السكاين=اشقته واعمته وانهت مابقي له من حصيله

اتذكره كل ماشوف القسى والعطف والين=واتذكر كل مابرقن سرى وسط المخيله

وانا آتوجد على بعده وبعده دمر احسين=وجود عاشق ليامن شاف خلن مع خليله

من وين ياجي الفرح والسعد لامن غاب من وين=وانا الذي فوق وجه الارض مادور بديله

حبه نزل وسط قلبي وانتشر عبر الشراين=يسرح ويضوي بهاجوسي وبه روحي عليله

من وين ماروح واجهني وانا مابين نارين=نار الرجا داخلي والياس تتلهب وهي له

اخاف تغدي بي الدنيا وهو ماجا باليدين=واندم على مامضى والدمع وش ياقف هميله

اليوم وش عاد باقي ياغبوني عن ثلاثين=عامين مدري ثلاثه غيرها ماهي قليله

لاراح ورد العمر وش عاد يبقى لي من اسنين=حليل مثلي تولع في هوى الغالي حليله

همي تكابر وانا والقلب ضلينا محازين=حملي ولو نيس الاجرد ياربى يعجز يشيله

من شاف حالي وانا ادوره ضيع للعناوين=يحلف ويقسم برب البيت ماعندي قبيله

وانا من ابني سليم الهوج من روس الزهارين=مخلصين العميل ومحتمينه من عميله

اهل الوفا والكرم والطيب والامداح والزين=مابيننا اللي يعرض لردا والا الفشيله

عون الحبايب خلقنا الله وسقمن للمعادين=معروف عن ولدنا دايم مولع بالجميله

حضي كذا ماسمع صوتي ولا وجه لي العين=واللي كتبه الله المولا على ابن ادم يجيله

يالله يامنزل الفرقان والرحمن والتين=طالبك انا طلبك همن على قلبي تزيله[/poem]