وَلَهْتي لوْ شْوَيّ علي ؟
إشْتقتي لي ؟
قوليلي :
وشْلون المسا .. مِنْ غيري
وشْلون الصّباح
وشْلون يُمُرّْ .. يومِك عليك
باهِت ، وبَرْدان ، وحَزين ؟!
ولاَّ يُمُرّْ مِن بَعْدي رَوعه ومِمْتلي ؟
حَسَبْتي إن الفَرقا ما بيني وبينك .. للأبد
ولاَّ ابْتِسَمْتي في سِرّكْ وقِلْتي :
هَـ الزَّعَل مهما يطُوْل سحابة صيف أَكيد .. أكيد بْـ تِنْجِلي ؟
ولو تِسْمعيْن أَغاني حِنّا نْحِبّها
ما يشَاغِبِك قلبك يقول :
عَشَاني إتَّصْلي عَليه !
وَحَشْني صُوته ..
ضحْكِتِه ..
حتى جُمِرْ كلامه واحِشْني .. وأَبيْه !
عَشَاني إَتّصْلي عَليه ..
عَشَاني أَرجوك اسْأَلي ..
حبيْبتي ..
ما شَاغَبك قلبك عليّْ ؟!
بالله قوليلي الصّحيح : إشتقتي لي ؟
أَمَانه ودّي أَسْألِك :
طُوْل الفُراق .. فَكَّرْتي فيّ ؟
قَعَدْتي مَرَّه بْـ غِرْفِتِك
تِتْمَنْظَريْن ..
وكِنْتي بْـ كامل زيْنِتِكْ
وقلتي لْـ غَنَجْ أنُوْثِتِك :
ودّي يشوف تسْريحِتي ..
نَفْسي يشِمّْ هذا العِطِر ..
ويقوللّي رايه فـ الرُّوج الجديد
وأَيّْ اللّي أَحْلى ..
هذا .. ولاَّ روجي الأَولي ؟
ودّي يشَارِكْني دَلال أنوثتي
ويضُمني .. !
ويمْسَح على راسي بْـ حَنان
هوْ يَدري إن لمْسَةْ ايْديه ..
فيها حياتي ومَقْتلي
حَبيْبتي فَكَّرْتي فيّ ..
وانتي على تَسْريحتك
اشتقتي لي ؟!
ما اكذب عليك
أنا كثير إشتقتلك
عُمْري أَحِسّه مِن غيرك خَليْ !
لا أرضي أرض
ولا نجوم :
تزيّن الليل بْـ سماي وتعْتِلي
ضايع وينْقِصْني انتِماء !
لاني لأَحَدْ .. ولاني لي !
أنا كثييير اشتقتلك
حبيْبتي ..
ما اشتقتي لي ؟!
مسفر الدوسري 