1/ هل أنت من المحافظ على الأذكار في كل حال..؟
نعم الحمد لله احافظ على الورد والتحصين وتحصين ولدي بعد .!
2/ إذا قابلت شخص سواء تعرفه أم لا تعرفه وطلب منك الوضوء باعتبارك أنت من سببت له العين هل ترضى بهدوء
أم تعارض..؟
اعارض لأن هذا إتهام لي بأني اصيب بالعين وانا لست كذلك لان لو عجبني شي ذكرت الله ومن قلب
ولا اعرف احسد احد
3/ هل إذا رأيت شيئا يعجبك قلت [ماشاء الله تبارك الله]
أم لا..؟
تعود لساني على قول "ماشاء الله" حتى على الاشياء التي لا تعجبني !! تعودت
والسبب في ذلك أن احدى زميلاتي بالجامعه سابقاً كانت مشهورة بعينها وحسدها ولو اعجبنا شي فيها وسألناها عنه قالت بسرعة "قولوا ماشاء الله" حتى خزنت رقمها بجوالي "قولي ماشاء الله"
4/ هل أُصبت بالعين ، اذكر لنا قصتك..؟
انا حياتي من عين في دحديرا
والحمد لله على كل حال
القصة الاولى /
وانا بزواج اختي كان في وحده واقفة جنب امي وماتدري انها امي قالت شوفي هذيك البنت كيف شعرها مغطيها ووين واصل قالت امي تراها بنتي واذكري الله ، ثاني يوم من زواج اختي بدأ يطلع بفروة راسي حبوب إذا حكيتها يطلع منها ماء ، وبدأت تنتشر وتكبر مساحة الحبة ومكان كل حبه يتساقط منه الشعر امي على طول عرفت انها عين من هذيك الحرمة اللي امي ماتعرفها عشان تأخذ من اثرها ، ظليت اتعالج بالمستشفى 3 سنوات حتى مو عارفين يشخصون المرض كل مره يجربون على فروتي شامبو ومرات مراهم لين طفشت ولا اتذكر كيف رجعت طبيعية بعدها والحمد لله
القصة الثانية /
انا كنت طالبة بنفس الكلية اللي اختي موظفة فيها .. وكنت اذاكر زين من زود الدفارة وتجيني زميلتي اللي عطيتكم نبذه عنها انها راعية عين قالت انتي مايحتاج تذاكرين اصلا لو يشوفونك بالرصد ناقصك علامة عن الامتياز رفعوك عشان اختك واسطه .. واحمل هذيك المادة وصارت سالفة بالكلية عشان رسوبي لاني واثقة من نجاحي ومشاكل لين فتحوا لي اوراقي وراجعوها وطلعت فعلا ناجحه لكني رسبت على قولتهم بالغلط في جمع الدرجات مدري تشابه اسماء !! .. وانا اقول عينها اللهم صل على محمد ، كان في بنات يسألوني من أنا بنته عشان موضوع خطبة ونفس الشي يسألون عني عند اختي فتجي نفس الزميلة هذي وتقول ياكثر خطابك وحنا الله لنا !! ، وعلى كثر الخطاب تأخرت بالزواج ولا تزوجت الا بعدهم كلهم وياليتها بعد زيجة خير
والحمد لله ، حتى الوظيفة كانت تقول لي انتي بس بتتخرجين وبتوظفك اختك !! .. ويتوظفون كلهم وظائف حكومية الا انا !! والحمد لله على كل حال .
القصة الثالثة /
كنت لابسه خاتم قالت نفس الزميلة اللـــه
ياحلو خاتمك من وين شريتيه وبكم ووشو هو ذهب؟! وبس قالته وخلال ثانية وانا اجر الكرسي باجلس وهو يصك ذيك الصكة الاليمة بالكرسي اللي جنبي ولا ادري اصلا كيف صك فيه الا والكرستالة طايحة في آخر القاعة والخاتم باصبعي مشوه
قالوا البنات : يختي اذا عجبك شي اذكري الله يالمشفوحه وانتي يافلانه اللي هو انا قالوا : زين جت بالخاتم ولا جت باصبعك
هذي كانت اسرع عين شفتها بحياتي
كنت بهذيك الفترة احاول آخذ من اثرها بدون ماتدري عشان لا تآخذ بخاطرها وصحباتي يجمعون فناجيل القهوة عشان اغسلها وآخذ الموية اغتسل بها لكن سبحان الله حاولت وبائت كل محاولاتي بالفشل ومادري ليه كان يصير معي كذا مع العلم اني إلى الآن اعاني من عينها في امور كثيرة بحياتي .
عندي قصص كثيرة بس طولت عليكم .. وياليتها تجي على العين كان اهون لكن اسأل الله الواحد الاحد الفرد الصمد الذي لم يتخذ له صاحبة ولا ولد أن يبتلي كل من يفعل السحر ويأذي الناس به (بالأورام والاسقام) وأن يجعل تدبيرهم تدميرا عليهم ..
5/ مالسبب برأيك في كثرة الإصابة بالعين وتداولها بين الناس..؟
الابتعاد عن الله سبحانه وعدم المداومة على ذكر الله وورد الصباح والمساء والتحصين بعد صلاتي المغرب والفجر
عن تجربة .. منذ أن بدأت المحافظة على وردي لم الاحظ على نفسي أي تأثر بالعين ولا غيرها ولكني لازلت اعاني مما اصابني سابقاً والدعاء وقراءة القرآن كفيلة بعد الله أن تزيل مابي ...
شكرا لك نور .