قصيدة لشاب خطب بنت عمه المليونير
سبحان من يرزق بتوع الملاييـن
الرازق اللي ما يخيب الرجـا بـه
لي عم عنده معـرضٍ للصواليـن
أموت واعرف بس من وين جابه
وإذا سألته قـال بعـت الدكاكيـن
ما يدري إني ما هضمت الإجابه
الشاهد إني رحت له قبـل يوميـن
في قصره العامـر ودقيـت بابــــه
قال ارحب ارحب عدّ ورد البساتين
يا مرحبا باللـي لفـا يـا هلابـــــه
قلت البقا عـدّ النفـل والرياحيـــــن
يا شيخ شمل اهل الكرم والذرابـه
قال اسلم الله يحفظك لي من العين
وآمر أوامر حضرتـك مستجابـــــــه
قلت الصراحة طالبٍ قرب غاليـن
ودي تزوجنـي كريمتـك يـابـــــه
ثنّى وقال اهليـن والله وسهليـن
والكون ترخص لجل عينك رقابـه
لكن ترا عندي شـروط وقوانيــــن
قلت اشرط اشرط يا حبيب الغلابـه
قال أولاً مهر العروسـة ثمانيـن
غير الرسوم وغير حق العصابـه
والثانية عمك يبي منـك سبعيـن
رسم الأبـوّة والنسـب والقرابـه
وام العروسة حقها منـك ستيـن
عشانها ست الحسـن والمهابـه
واخوانها كلن يبي منـك خمسيـن
عداً ونقـداً تنـدرج فـي حسابــــه
وخواتها الخمس اعطهن من ثلاثين
عشان تتوثـق عـروق النسابـــــه
وتجيب طقم عيار واحد وعشريـن
وخاتم من الماس المصفى ترابـه
واكياس متروسة كعوب وفساتيـن
ألوانهـا واشكالهـا مـا تشابـــــــه
وموتر بسواقـه وفيـلا بدوريــــن
أثاثهـا مـن بطرتـه ينحكـابـــــــه
واحجز لنا قاعة بقصر السلاطيـن
واحجز بهـا رقاصتيـن وربابـــــــه
وامنع دخول اهل اللحى والبزارين
واعزم أميـر المنطقـة بالنيابــــــه
هذي الشروط اللي على بالي الحين
وذكرني اللي ما حسبنـا حسابـــــه
قلت اذكر الله يا عـدو المساكيـن
واستغفـره لا يبتلـيـك بعـذابـــــه
الظاهر إنك منت عارف أنا ميـن
أنا لو ارقا فـوق متـن السحابـه
ما جبت حتى نص درزن مواعيـن
واضحك بكيفك واعتبرهـا دعابـه
شروطكم هذي شـروط المجانيـن
شروطكم شغـل ابتـزاز ونهابـــــه
شروطكم تقصم ظهـور البعاريـن
شروطكـم همّـن وغـم وكآبــــــه
شروطكم والله سيوف وسكاكيـن
تذبح بنات المجتمع مـع شبابـــــه
وين الرضا والعطف واليسر واللين
اللي ذكرهـا الله بمحكـم كتابــــــه
وين الصفات اللي أمرنا بها الديـن
وين اختفى نهج النبي والصحابـه
يا عم جعل اللي خلقنا من الطيـن
يرد عقلك مـن خطـاه لصوابـــــــه
ويجعل نصيبي عند غيرك قل آمين
ويحسن عزا الصابر ويجزل ثوابـه
قال انت لو فكرت تفكير صاحيـــــن
ما شفت في مجمل شروطي غرابه
حنا بعصـر العولمـة والمزاييـــــن
ماهوب عصر الفلسفة والخطابـه
الناس تسعى للرتـب والنياشيـن
وانت اهتمامك بالشعـر والكتابـه
والشعر ما ينفعك لو هو دواويـن
ما دام جيبك مثـل بيـت الخرابـه
يا بوك لا تسمع كلام المصاخيـــــن
واسأل مجرب عاش في وسط غابه
قلت الله اكبر يا محـرر فلسطيــــن
من يسمعك يحسبك ذيـب الذيابـه
تراك شايب راس مالـك رياليــــن
والبنت ما تسوى جنـاح الذبابــــه
قال انقلع مالت على وجهك الشين
لا عاد اشوفـك عندنـا يالزلابــــــه
قلت ابشر ابشر لكن الباب من وين
واقفيت من عنده على صوت بابـــــه
ـــــــــــــــــــــــــــــــــــــ
|