[احساسي غريب]

قصيدة الشاعر طلال عبدالله العازمي يوم زواج حبيبته وهي
من قبيلة ثانية ودامت علاقة الحب بينهم اكثر من عشر سنوات
والقى الشعر للعريس الذي هو ابن عمها امام الحضور بقاعة الزواج ...
تقول القصيده ..



ابد ما جيت ابارك لك ولكن جيت باوصيك
على الله ناوي ن تدخل بها الليلة .. معذبتي

ترى لولا الظروف اللي عطتك وحدت محاكيك
قســـــم بالله ما تدخل عليهـــا ولو على رقبتـــي

ولكن النصيب اقوى ولاادري ويش اسوي فيك
نعم .. صارت معزبتك .. ولا صـــارت معزبتـي

كذا شــــاءت الاقــــدار تحرمني لجـــــل تعطيـــــك
كذا لازم عشان تفوز انت , انا اخسر بتجربتي

تراها غاليــــه جـــــدا وتكفى .. والله يخليـــــك
تدللها ... تدلعها ... تنسيهــــا مصاحبتـــــــي

انا من كثر ما اغليها احس اني بديت اغليــــك
ولا تسأل بأيـــــة حق والا وش مناسبتــــي

لأنك لو بتسألنـــــي بتسمع شي مــــــا يرضيك
لـــــذا يا خوي لا تسأل ولا تسمع لأجوبتـــــي

ابيــــك تحطها في داخــــل عيونك وبيـــن ايديك
وهي دلوعة اعتـــــادت على كثرة مداعبتــــي

فداعبهــــا شـوي شـوي حتى تشتهـــي طاريـك
وشاغبها الين تقول : بطل من مشاغبتـــــي

واذا هي مالها خلقك ,, ولا تضحك ولا تسليك
تحملها واسألهــــا : ياعمــــري ليـــــه عصبتـــــــي

وبالك اسمــــع انك تضربهـــــا وهي تشكيـــــــــك
مايحتـــاج اوري لك بفـــن الضـــرب موهبتـــــي

صحيح انك بتملكهـــــا ومعك العقـــــد بتمليــــــك
وانا عارف حدود الله ومن حقــــك معاقبتـــــي

ولكن قل لها : المجنون وصاني وهو يعنيــــك
يقـــول انه بينظـــرك لـــــو شيب وشبتـــــــي

وانا مجنونها اللي مـــــا نساها وانت مايمديك
تغطي ذكرياتي .. في هواها و ربع تجربتـــي

احس اني تماديت بكلامي , والغضب حاديك
ولو انك في مكاني ما تفكـــر في محاربتـــــــي

كفاك اني تركت الليله اشغالي عشان اجيــــك
دخلت القاعة برجلي ولا ادري وش عاقبتــي

وانا ما جيت اخرب عرسك الليله ولا اذيك
انا جيت عشان اخاطبك واسمع مخاطبتــــــي

توصى . وانتبه . واحرص عليها والله يهنيك
ترى كل الكلام اللي طلع من ضيقي وكربتـــي

ولكن ماقدرت اني اقوله وانت مايخفــيــــــك
اخــــاف اني اذا قلته تقــوم وتقطع رقبتــــــي