[الشغموم]

قصيدة من نظمي اتمنى ان تعجبكم

حسبت ان السحاب اللي هما ينبت لي الزملوق
حسبت القاع الاجرد بالمطر تنبت نواويره

واحس اني قريب ارحل من الصبخا وافك النوق
واحس اني تعبت من الطريق ومن مشاويره

واحس اني صويب ن صابه التفّاق في المعلوق
واحس اليا نجيت احيا بحلم ن صعب تفسيره

واحس الحد يقطع كل عرق ن في يدي موثوق
واحس الشمس ما تشرق علي ولا على الديرة

رعى الله الغريب اللي عطاك وله عطيت حقوق
رعى الله القريب اللي صفا قلبه وتعبيره

رعى الله الشلي والعود الازرق والسخا والذوق
رعى الله الدلال الصفر واهل السمت والجيره

رعاك الله يا عد(ن) سقى واروى ظميّ عْروق
تحوف الدار واهل الدار والعاني تباشيره

و سور الصين يبنا بين عاشق يرقب المعشوق
صدى صوت القطاعة يصدح ويضرب على زيره

أضيع إمن البحر والنجمة اللي تشتعل من فوق
واضيع إمن الخزامى والخلا واحلى دعاثيره

على وضح النقا عشق ن عفيف و في سماه يتوق
نشا بين الضلوع و يرتوي من دمي الغيره

وانا ابغض من يبيعون المراجل واعشق الهدلوق
وانا اعيش الحقايق واجدع الكاذب واساطيره


وانا اهاب البحر والضابح اللي يقصم الدانوق
وانا احدد مساري قبل اعجل وانتوي سيره

يبين الفرق ما بين الوطا والعالي الشاهوق
ولا يخفى على شوف الفهيم ولا على غيره

وصلى الله عدد ما ناض في بطن الخيال ابروق
على طه النبي ما هل غيث(ن) من مزابيره،،،