[عيوني لك]

بسم الله الرحمن الرحيم
السلام عليكم ورحمة الله وبركاته

اووف كيفكم يالشباب وش الاخبار انا جاي ودين امي اخلاقي قافله لوسمحتم ما ابغي اي غثاثة من احد لاني ماراح اتحمل كفايه اللي فيني نفسي ترونها راس مناخيري .
----/ وشفيك سلامات يابو الشباب خير اشبك جاي الاستراحه بهذه النفسيه وش صار لك ؟ ياخوي انبسط وفرفش شوف الشباب كيف مبسوطين ومروقين المنقه على اخر حلاوة وانت جاي عابس الدنيا بوجهك . انبسط وقولي من اللي مكدر خاطك ؟
-----/ اقووول ترى ماني فاضي لتريقتك هذي عاد اللي يسمعك يقول ان عندك في استراحتك ذي شي ماهو موجود في العالم الا عندك قم بس قم وخر انت وشوشتك خليني اشوف التلفزيون ابرك من شوفتك وجهك.
-----/ يا ابن الحلال انت وشفيك ماتدري ان الاستراحة لها من اسمها نصيب وبعدين تعال شوف الشباب كيف يسولفون ويضحكون اللي قاعد يلعب بلوت واللي قاعد يلعب سوني واللي قاعد يغازل بالجوال واللي راح فيها خروف ومتخرفن ع الاخر واللي واللي وانت جاي وكن هموم الشعب ومشاكلهم عندك . يارجال والله ماعندك سالفه بس هات العلوم وش عندك اليوم جاي مطنبر وقافلة اخلاقك ؟ لايكون المدام فركت اذنك ؟ والا واحد من الديانه اشتكاك ويطلب فلوسه ؟والا اكيد انك تأخرت في دفع ايجار الشقه ومالميته تراها هذي عوايدك تبعثر الفلوس واذ حل الايجار قمت تتخبط يمين وشمال وتصيح الحقوني .
-----/ والله يابن الحلال مافيه انسان الا وعنده مشاكل والديون ماخلت في ايدينا شي . يعني تبغى تقولي انت وجهك انك مبسوط ومرتاح وماعليك ديون لا حبيبي انا ادري والله لوتاخرت عن ابومسامح في قصد الونيت ليقعدلك زي الشوكه الين تعطيه صح والا لا؟
-----/ صح بس الواحد لازم يصبر ويحتسب .
-------/ ايه هذا اللي انت فالح فيه اصبر واحتسب .
المشكله ياخوي ان هذا الشهر تجمعت مشاكل بقعاء كلها فوق راسي . اول شي المدام بنت عمها بتتزوج وتبغى تحضر الزواج وبفستان جديد هيه شوف قد ايش يكلف ؟ وثاني شي السيارة انتهت الاستمارة ولازم اجدددها والمشكله اني ما اقدر .
-----/ ليش ؟؟
------/ ليش تسوي نفسك ابله ماتدري مخالفات يالحبيب تدري وش يعني مخالفات حوالي 4000 الآف ريال وكل ابوها من ساهر الله لايجزاهم خير . ياولد ذبحوني بالمخالفات الله لايبارك فيهم ماتمشي 70 والا 90 الاوالصورة تكشح في وجهك وخذ لك تسجيل مخالفات والله يعين .
------/ اي والله انك صادق الله يعين . وش كمان ؟
-----/ وثالث شي الاتصالات الله يهلكهم الفاتورة جات بمبلغ ماتتخيله . تصور اني حاط الحد الأتماني 300 ريال وتجي الفاتورة بـ 600 والا 700 ليش ما ادري وتدق عليهم ويلطعونك من ربع ساعة الى نص ساعه وماتطلع بنتيجه .
اوووووه ياشيخ خلها على الله هذا من غير اغراض البيت وطلبات الاولاد ... وتقولي وشفيك ؟ خلها على بس . خلني ساكت احسن .
------/ الله يعين المهم شفت المباراة اليوم ؟
------/ ايو الله شفتها وياليتني ماشفتها ياشيخ يالله عليك هذا نادي؟ وين الانجازات وين المستويات اللي يقولون عنها ياشيخ لامدرب افلح معهم ولا لاعبين ولا ادارة ولاهم يحزنون .
لحظه لحظه اشوف من اللي يدق ع الجوال . الوووووووه .... هلا ايش فيه ؟ طيب طيب خلاص الحين جاي . يالله مع السلامه . خلاص صك السماعه .اووووووووووووف .
-----/ سلامات يابو عسى ماشر ؟
-------/ لاياسيدي بس كالعادة اسطوانت النكد زي كل يوم المدام ياسيدي . يالله الله يعين تصبح على خير اي خدمه غير الفلوس والاخلاق الطيبه ؟؟
-------/ فارقني هذي عوايدك زي كل مرة تصبح على خير ...
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ

ولكم كل ودي