هلا هلا اخوي خادم جدته حياك على الدخله القوية ذي
ودي أنك قلت ملاحظتك هذي بقسم الحوار نتناقش ونتباحث في هذي القضية اقصد اللي أنت تشوف أنها قضية
والله شوف اخوي أنا ما اتفق معك بملاحظتك لأني ماعمري لاحظتها هنا بقسم الشقائق سامحين لأخواننا يشاركونا في جميع المواضيع ماعدا المواضيع النسائية البحته اللي ماتخصهم مثل الازياء وشغلات البنات الخاصة أما الطبخ فحياهم الله لأن وبدون مجاملة بعض الرجال نفسهم بالطبخ أطعم من نفس البنات ..
كثير اقرأ مثل ملاحظتك هذي في منتديات ثانية واحس أن اللي يلاحظون هالملاحظه عندهم مشكلة وينقصهم فقط إحسان الظن بالناس لأن لو جلسنا نراقب فلان وفلانه وين يردون ووين مايردون بنجيب لأنفسنا الهمّ ، بإستثناء لو لاحظنا شي واضح جداً للعيان أن فلان ورى فلانه كل ماكتبت سطر اقتبسه والا كل موضوع لها نلاقية مرتز وراها وراها هي بالذات وأنا ما اتوقع أن هالشي صاير لاسمح الله هنا بمنتدى زهران .. وبعدين أنا اعطي الجميع حرية إبداء الرأي في قسمي مافي مشكلة لو دخل واحد من الاخوان وابدى رأيه بكل اريحية وبنية طيبة في موضوع اخت له بحيث مايجرحها أو يتعدى حدوده ، وفي نقطة مهمة جداً أن حسن أختيار العنوان يجذب القاريء ويشعر لا أراديا لو عجبه المقال أن يبدي رأيه ويعلق أو حتى يضغط زر "شكر الكاتب" ويخرج فهذي ليس لها دخل بجنس الكاتب هل هو ذكر أو انثى !
أما قصتك أنك كتبت بمعرف أنثوي والله مشكلة
طيب وش استفدت لما عرفت أن شباب المنتدى يطاردون دلوعة الباحه ههههههه الله يصلح حسابنا يابحر موت
اخوي باقول لك على شي كمعلومة تثبت أن بالقصة شيء من الّلبس
أنت تقول أنك في المنتدى كنت مسجل بأسم بحر موت ثم سجلت بأسم دلوعة الباحة ، ثم تأتي الإدارة وتعرض عليك يادلوعة الباحة الإشراف لأنك البنت التي وش زينها
أنا سبق وأدرت منتدى خاص بعائلتي فأي إدارة في العالم عندها خاصية كشف المعرفات الرديفة لأن الـ admin اللي بيده لوحة التحكم يتلقى رسالة آلية بأن بحر موت هو نفسه دلوعة الباحة إذ يحمل نفس الآي بي ويستخدم نفس الجهاز وهكذا .. فأيش الإدراة هذي اللي تعرف أنك شاب ثم صرت بنت وساكتين لك وفوق هذا يعرضون عليك الإشراف !!
بخصوص قصص الخرفنه والله مادري وش اقول لك بس لها منتدياتها الخاصة اللي تنعرض فيها ولا اعرف ليه بعضهم يتفاخر بأنه قبل على نفسه يصير كذا وفلوس وشحن ومدري أيش الا اذا قلت بأن الواحد يسويها عشانه ناشط وباحث في المنتديات وهذا يعني أن عنده تصريح يسوي حساب بالبنك لهذا الغرض والا كان ممكن ينسجن لو طاح بيد الهيئة هذا غير أن كشوفات الحساب بالبنوك مراقبة من شان قضايا الإرهاب ودعمها ..
عموما احنا استطردنا كثير لكن اعتبرها أنا نقاش ذو فائدة
ويعطيك العافية