[طوق الياسمين]

[ALIGN=CENTER][TABLETEXT="width:70%;"][CELL="filter:;"][ALIGN=center]


مساكم الله بالخير



من يوم اصبحت وأنا جالسه قدام قناة الجزيرة ومرات أغير جو وأروح للعربية وأحيانا اعطبها وأحط السي أن أن
والله أن الوضع مزري في مصر والجزيرة الله يهديهم كل شوية يعيدون لقطة سيارة الشرطة اللي دعّست المتظاهرين
قسماً إني بغيت أستفرغ يوم شفت المناظر .. شي محزن وناس ماتخاف الله تذبّح المتظاهرين بالسيارات والجمال والحمير والبغال .. تخيلوا في عصابة اسمهم الخيالة متخصصين في دهك الناس وتكسيرهم بالخيول والجمال ما كأن الناس ناس معاملة حيوانات أجاركم الله ، لعنة الله عـ الظالمين



ماعلينا .. أنا شفت المنظر من هنا وطلعت بعدها بشغالة اخوي تتقضى عشان بتعوّد ديرتها يقولون بتروح عروسن >> ناس تجهز للزواج وناس تموت في المظاهرات
وأنا في السيارة اشوف شي بالسماء .. لمبات مولّعة وسط السماء يعني لاهو عمود كهرب ولا هو طيارة ولا نجمة ولا أدري وشو نور وثابت في السماء
وافتح الشباك إلا وذي طيارة "الشبح"
لاحد يجيني مطفي النور ويقول والله أن تبطين وأنك كذابه
قسماً بالله إني شفتها في سماء الرياض الليلة طيارة سوداء شكلها مثل شكل "المعيّن" اللي درسناه بالرياضيات سنة رابع
وواقفة بالسماء واشهق وابغى احد يتفاعل معي والمشكلة أن ماحد يتفاعل السواق والشغالة مايفهمون
وولدي وبنت اخوي اطفال ولا لقيت من يبادلني الحماس والخوف
وارجع البيت واحكي لأخوي قال عادي تطلع هالطيارات بالليل هذولا اسرائيل يراقبونا
أنا قد كلامي هذا ووالله إني شفتها وللمعلومية هذي ثالث مره اشوفها بحياتي وما انسى شكلها لأنها مرعبة
كأنها بات مان بس على أعرض
المره الاولى وأنا بزر أيام تحرير الكويت في وسط النهار
والمره الثانية قبل 12 سنة وبالليل وهذيك الأيام كان في عمليات إرهابية بالرياض
والليلة هي المره الثالثة


ماتفسيركم لهذه الظاهرة .. المايك لكم
[/ALIGN][/CELL][/TABLETEXT][/ALIGN]