هل تحب القيادة في خط السفر أم تحب أن تكون راكب ؟
لا والله ودي أكون راكب عشان أسدح المقعده وأرقد خصوصاً إذا كنت في خط طويل 
من تحب ان يكون دائما بجوارك وانت مسافر ؟
أي واحد أهم شئ يكون فرفوش وإذا كنت أسوق لايشغلني ( هد - أنتبه - تفتيش- أنتبه لذياك بيتجاوز )
يسولف سواليف ويترك الطاره لقايدها 
لو جعت بخط السفر ، هل تتوقف وتاكل أم تاكل بعد الوصول ؟
والله أنا من الناس اللي ما أعرف أمشي ولا أرقد وانا جيعان يعني أوقف وعوذ بالله من أبليس العجله مافيها خير 
كم سرعتك في خط السفر ؟
من 120 إلى 160
وبيني وبينكم والله أني أطبقها أحيان إلى 180 بس لاحد يدري 
تشغل المسجل في الخط ؟
على حسب أحيان تمسك معي شعر وأحيان الله يغفر الذنب محمد عبده أو كاظم 
وش نوع السياره اللي تحب تقودها اثناء السفر ؟
أم شئ تكون قير أوتوماتيك
والله يسقي زمن الفياقرا قسم بالله لكرهت كل السيارات بعدها بس أفلحت في حال سبيلها 
هل تحب ان تكون لوحدك في الخط ؟
لا
كم مرة توقف للراحه وانت مسافر ؟
على حسب ( شاهي - باور هاوس - بنزين - شندويتش ع الطاير ) وإذا كنت جيعان مره وقفت ودهفت فوق ذيك الكبسه
هل تفحص سيارتك قبل السفر ؟
أكيد 
تحمّل معك عفش كثير بالسياره ولا يكون عفشك قليل ؟
والله بيني وبينك إذا كنت وحدي شنطه لملابسي وشنطه دوبلماسيه للأوراق والأغراض الشخصيه يعني شئ بسيط
أما إذا كنت بالعائلة قسم بالله يالشنطه والمقعده اللي ورا مايتمدد فيه الفار
وأحيان تشوف الأكياس من فوق راسي
لو انت مسافر وقلنا لك خذ معك عضو في خط السفر ، من تختار ؟
والله ودي كل اللي في المنتدى أطلع معهم في دينه
بس ودي
أخذ محمد عبدالرحمن وسعيد بن سالم
وأحطهم في المرتبه اللي ورا وأبدي عليهم بقارعه
وأسمع أسمع ياشيخ
أخليها بينهم بدع ورد
في خط السفر ، تحب تتسابق مع السيارات الأخرى ، أم لاتلقي لها أي اهتمام ؟
أخر ماجتني الحاله هذي قبل 6 سنوات أيام الكامري تجاوزني كامري نفس الموديل ( ليموزين )
وطنقر الزهران وقال أفا يالعلم ليموزين عاد
المشكله ماشي هو 180 ويوم شديت شد
والله ماتجاوزته الإ ع الطبلون يعني وأنا ماشي 220 وبالدف وصلت
بس الحين أقول الصلاح من الله
موقف لاتنساه حصل لك وانت مسافر ؟
هذا موقف قبل ثلاث سنوات
وأنا ماشئ من الرياض للطايف وحداني
مسرع والله
وأول تفتيش قسيمه
وبديت أهدي
ثاني تفتيش قسيمه كلمته وقلت ياخي توي ماخذ قسيمه حرام عليكم قال والله لو تسرع ذلحين لأدقك بالثالثه
برضوا طنقر الزهراني ودق التفحيطه ومشى
وقبل الطايف بـ 200 تقريباً والقسيمه الثالثه
المهم الأخلاق قفلت
حطيت القسايم الثلاث على الطبلون طبعاً الثاني لما شاف أني ماخذ قسيمة سرعه أعطاني مخالفة تظليل
والثالث ماقصر أعطاني قسيمة إستماره منتهيه
المهم قبل أوصل تفتيش الطايف والقسايم مرصوصه على الطبلون فكيت الحزام << قفلت الأخلاق 
وقفني العسكري قال إثباتك
قلت سم
قال يازهراني ليه ماتربط حزامك
قلت أبغى قسيمه << هذا اللي حصل والله
العسكري سوا كذا 
قلت أيه أبغى قسيمه وبيني وبينك باقي فيه فراغ في الطبلون أبغى أعبيه وأنا أشر بيدي قال وش هذي
قلت الله يسلمك هذي قسايم بجميع المخالفات منوعه
وماباقي الإ الحزام وإن شاء الله ماتقصر معي
برضوا سوا كذا
قال معقوله ثلاث قسايم
قلت هذا للي صار
طالع فيه وقال روح يازهراني وهو يبتسم
ماعطاني قسيمه مع أني كنت ناوي ادخل موسوعة قينس للأرقام القياسيه
ها وسلامتكم 
احلى مره سافرت فيها ، متى كانت ومن معك بالخط ؟
ما أذكر بس اللي أعرفه كل سفراتي فله
هل تحب تسافر في الليل ولا في النهار ؟
الليل << مثل القمر
نصيحة توجهها للأعضاء بشأن خط السفر ؟
أنتبهو من ساهر
آخيرا ، اختر عضو بعدكـ .
عابر سرير
خلنا نوف وش عند ذا المغزول