[الراس الصغير]

طاااااااااايب طيب ياعندليبوه ه ياراعي الدبلماسيه

فضحتنا حسبي الله على شيطانك



بس ماقلت لهم وش نوع الرساله اللي جتك مني قبل اتصالك

الراسله اللي ارسلتها لك وخلاك تكلمني

اسمعوا القصه يا الربع

انا فعلا ذهبت للمطعم الهندي ومعاي ( ام خالد

نغير جو وناكل طعام وهذا
ولازم الواحد يغير والا وش رايكم ؟

المهم طلبنا وجلسنا ننتظر العشاء

واثناء الانتظار اقلّب في الجوال وتذكرت رساله مضمونها كان
يوجد تسجيل على شركة التصنيع
يبون ثانويه علمي وصناعي
وقلت خلينا نرسل الرسالة للشعب ممكن احد عنده قريب يبي يسجل في الشركه

المهم ارسلت لمجموعه اشخاص عندي في الجوال

وما رد منهم الا العندليب
قال مشكور وجاري التعميم

انا وقتها بديت ارد وقلت اسكت ساكت انا والله اني مزنوق في مطعم مع المدام وماعندي هروج اسولف بها عليها فقلت بشغل نفسي بالرساله هذي واشوف من يرد

وبعد ما استقبل الرساله

اتصل العندليب بسرعه

وفي ونشمي هذا الاادمي اللي هو العندليب

ويوم انه اتصل سويت نفسي رسمي وتعرفون المطعم مليان عوائل
وانا ابي ابين له اني عايش الدور ( رومنسي

وسوالف واعتقد انه قال لكم السوالف في بداية الموضوع حقه

بس قبل ماينهي الاتصال قال اذا ما فضحتك في الاستراحه يارومنصي

قلت تكفى لا

قال باقي تشوف في الاستراحه

قلت لا لا فكنا ياراعي الدبلماسيه

الضاهر انه عاند يوم قلت له يا راعي الدبلماسيه

وبعدها اشوف انه فعلا والله سواها

ومادريت الا من رساله عبر الجوال يقول قسم الاستراحه موضوع خخخخخخ

لكن بصيطه بصيطه ياراعي الدبلماسيه





واسكت ساكت ماتدري وش صار لي بعدما خرجت من المطعم

ماتقول الا تعشينا وخرجنا

ونروح للسوق وبعدما خرجنا من السوق اشوف سيارة صغيره بجانب سيارتي
وفيها اطفال صغار ماحد معاهم
ومقفل عليهم ابواب السيارة والزجاج

يعني مساكين الاطفال ماتشوف الا العرق يتصبصب من وجوههم

طبعا انا والله اني جلست استنى ابوهم
قلت ياولد هذا صاحي يخلي اولاده في سياره ومقفل عليهم والا على الاقل خلى الزجاج مفتوح

المهم استنيت واستنيت لمدة عشرة دقايق تقريبا

ابي اشوف ابوهم هذا وش خلقته وابغى اعطيه كم كلمه عشان مايزيد يخلي اولاده في السياره لحالهم
خوفي على انهم يموتون في السياره من قلة الاكسجين ونخسر عدد سكان العالم بسبب الاستهتار

المهم استنينا وطال الانتظار

قلت اقول بنزل اكلم الولد الصغير عشان يفتح باب السياره
عشان يتنفسون ويدخل اكسجين جديد عليهم
لان الاطفال شكل لهم مده في السياره

واكلم الولد الصغير ومافهم

احاول اني اشر له -- اقول افتح الباب
الولد خاف مني

يحسبني حرامي او ماشابه ذلك

اقول افتح باب وانا اضحك عشان مايخافون

والله مساكين العرق فوقهم ويبن انهم مكتومين يبون هواء

شوي فهم الولد وفتح الباب
انا قلت وين بابا

الولد مايتكلم عربي

طلع اجنبي < يجيكم العلم بعد شوي وش سويت

بعد فتره تقريبا خمسة دقايق جاك ابوه لحاله ومامعه احد
ويفتح السيارة ويشوف الاولاد فاتحين الباب وكانه يقول ليه تفتحون الباب


وانزل انا

واجيه باسلوب طيب

قلت سلام
طلع الاخ هندي

قلت اولادك للبيع ههههههه

D
ضحك وقال نو
ليش ؟
طبعا هو ماقال ليش يقول واي باللغه وانا ترجمتها لكم

المهم
يوم انه قال واي ؟

قلت لانك لو تبيهم ماخليتهم لحالهم في السيارة ومقفل عليهم القزاز

قال انا يفتح شوي قزاز
قلت والله انه مقفل وانا شفته
حرام عليك ياخي

ذول اطفال صغار ومايعرفون يتصرفون
قلت افرض انك تاخرت عنهم وجيت بعد فتره ولقيتهم ميتين
بلله وش تسوي ؟

المسكين انحرج واعتذر لي وشكرني
وقلت تكفى لاتخسر اولادك بعد كذا


لانك لو تاخرت اكثر وماحد عندهم يمكن يموتون والله اعلم بسبب قلة الاكسجين

من قلة الاكسجين يمكن يموتون وهذا حاصل وقد صار

قال اوكي صديق شكرا

ومشى



طبعا انا ارتحت لشي واحد اني انقذت روحين من الموت والمفروض اني استلم جائزه من حماية حقوق الانسان



<<<<<<< والله ماحد درى عنك

لا والله الا المفروض نتعاون على فعل الخير
واذا شفتوا اطفال في اي سياره ومقفل عليهم فارجوكم ساعدوهم لانهم مايفهمون مساكين

نصيحه اخيره

الى كل أب
اذا نزلت من السيارة وتركت اطفالك فيها
فارجوك خل زجاج االابواب مفتوح قليلا او خذهم معك ياخي

هذا ماصار بعد سالفة المطهم الهندي والحمدلله كان اكلهم منتاز

وانصحكم يا متزوجين
غيروا جو
خذو نسوانكم ورحوا كلوا في مطعم هندي تراه منتاز


بس لاتاخذون معكم الاطفال
ترا الاطفال في المطاعم الفخمه يسوون لكم ازعاج وخاصة اذا انتوا تبون تسولفون

وبس

وش رايكم في لون الخط ( رومنسي صح