جتني تودع ودمع العين متشابك
ــــــــــــــــ قالت ابنساك وانت ارجوك تنساني
وبعذرك لو رحلت وطول غيابك
ـــــــــــــــ وقامت تودع بقايا جسمي الفاني
خذ صورتي في غيابي كحل اهدابك
ــــــــــــــ وارجوك لا تحترق حسره على شاني
انا عشقتك وصوتي قد تغنا بك
ـــــــــــــــــــ وصوت المنادي على فرقاك بكاني
في زحمة افراحنا قد جيت وش جابك ؟
ـــــــــــــــــــ خليتني يا حبيب الروح حيراني
مدري اواصل طريقي واحسد احبابك
ـــــــــــــــ لامن سمعت ان قلبك حب احد ثاني
والا اعاند نصيبي واتهنا بك
ــــــــــــ واجدد ايام عمري واعزف الحاني
وانسى الذي لو نسيته عشت لحسابك
ـــــــــــــــــــ ما كنه الا على حبك تحداني
والله ان قلبي اشوفه حيل هلا بك
ــــــــــــــــ لكن وش حيلتي يا مصدر احزاني
قلت اعذريني ترى ما ينفع عتابك
ــــــــــــــــ لو كان ينفع ندمنا عشت ندماني
ماهو بذنبي ولا هذا من اسبابك
ــــــــــــــــــــ هذا قدرنا وحظي دوم خواني
مير ارحلي للذي قد وقع كتابك
ــــــــــــــــ وانا كفاني من الاحزان ما جاني
خليني ابقى على ذكراك واحيا بك
ـــــــــــــ مجني عليه .. وفي حكم البشرجاني
شعر/سعد بن سالم العدواني