صابرين وحنا في مملّه
مثل صبر الجمل والحمل مايل
نبلع الغيظ وانذوق المذلّه
وانتسلّى بتمجيد الاوائل
ونترك الجرح وانغطي محلّه
بالحيل والرخيص من البدايل
ونفتخر بالوهم كثره وقلّه
ومجدنا النفط من جامد وسايل
وانشغلنا بصوره في مجلّه
والطرب شغلة اولاد الحمايل
واختلفنا على شوف الاهلّه
وننشد الحكم في لبس الفنايل
كم خذينا على فنجال دلّه
من سواليف واخبارٍ هوايل
وشجْرة انسابنا في كل فلّه
واشغلونا بتاريخ القبايل
ما صنعنا قلم ولا مسلّه
همنا ابلاك بيري والرسايل
امتلى النت سبعين ألف شلّه
بالنميمه وتحطيم الفضايل
وفي دعانا القنوت السيف سلّه
قصدنا الكون يصبح في غوايل
والخواجه عسى بقعا تعلّه
منهمك في المصانع والوسايل
سيّر المركبه والكون فلّه
واشعل بجنب الاعراب الفتايل
والفضاء عانقه واسهيل حلّه
وفوق سطح القمر سوى عمايل
دايم الفكر واطموحه يزلّه
ماحسب للحكي والشك زايل
بس حنا الكبر فينا جبله
بالبطر والدجل صغنا مثايل
اشرب الوهم يا حامد وبلّه
اف ستّةْ عَشَر تعديل عايل
انتبه يا غبي والكبر خلّه
الخواجه يعلّمك الدلايل
صح مناهجنا من خير ملّه
بس من غير فهم ودون طايل
كأنها ماتصحيك الادلّه
قلنا بعدها ويش أنت قايل
هدهد الثور وان عاند فتلّه
ما يعْرف الكُتبْ يبغى الخمايل
عود للشرع يصلح كل خلّه
واترك الهرج واعجل بالفعايل