قصتي مع الكمبيوتر وكيف تعلمت له
السلام عليكم ورحمة الله وبركاته
وعليكم السلام ورحمة الله وبركاته
قبل كل شي حقوق الموضوع محفوظه للكاتب يعني قد كتبت نفس الموضوع في احدى المنتديات فلا يجيني واحد بعدين يقول انك نقلتها لنا من منتدى او غيره حيث انني لا اؤيدها 
اللي يختلف العنوان فقط 
المهم بدون مقدمات نخش دوغري في الموضوع 
اجزم وبكل حزم ان ما أحد منا خلق وهوه يعرف يتعامل مع الكمبيوتر 
الا بعدما تعلم له ولكن كيف تعلم له ؟
هنا السوال ؟
الزبده 
باقلكم قصتي يوم اني اول مره امسك الفاره واتعامل مع الكمبريتر 
منذو ظهور الكمبيوترات في المقاهي وانا متردد ابي ادخل محل انترنت واشوف وش يسوون
عشان اتعلم للكمبيوتر وابحر مع البحارين في عالم النت
بداية المعاناة
دخلت يوم محل انتر نت منذو زمن ليس بالقريب ولا البعيد
يعني قبل حوالي 12 سنه تقريبا واسمع الشباب في المحل شغالين على الكي بورد وماتسمعون الا طق طق طق طق طق طق
كل واحد على جهاز
انا ماني عارف وش يسوون ؟؟؟؟؟؟؟؟؟؟
انقهرت من شباب كانوا اصغر مني سنا وشغالين وما اسمع الا طق طق طق طق طق
ياولد حسيت بعقده في حلقي
قلت ليه ما اصير مثلهم واتعلم لهذا الجهاز واطقطق زيهم
وش اللي ناقصني
ابغى اسوي مثلهم طق طق طق طق
وفعلا وليس امرا قلت لصاحب المحل الفلبيني ابغى جهاز
قال الساعه بخمسطعش ريال اللي اتذكره 
واعطاني جهاز وجلست اتفرج على الجهاز
جلست تقريبا عشرة دقايق اطالع في الشاشه والماوس والاسلاك
وكاني داخل غرفة عناية مركزه خخخخ
المشكلة اني ماقد مسكت الماوس ( الفاره) ولا اعرف اوجه السهم 
وابي ادخل على العالم
اسال نفسي وش اسوي الحين ؟
ماني عارف وش اسوي
تعقلت مكاني
واللي حولي شغالين طق ططق طق طق طق
ازعجوني خخخخ
قلت ياولد ابتنتهي الساعه وانا جالس اتفرج في الجهاز بدون فائده
فصحت في الفلبيني
قلت تعال يا صديق
قال يس
قلت اقعد جنبي ابغاك في سالفه
عشان لا يسمعوني اللي في المحل
قال ها اسلم وش بغيت يا مخلوق < طبعا هوه يتكلم انقليزي وانا ترجمتها باللهجه
قلت يا رجال انا اول مره ادخل محل انتر نت وابغاك تعلمني وش اسوي
قال عندك ايميل ؟
وانا وقتها كنت اسمع بالايميل وماني غشيم بس الجهاز ما اعرف له
قلت لا 
قال اسوي لك ايميل ؟
قلت ايوه
قال ابشر
قلت تكفى
سوا لي ايميل على الهوت ميل
وفتحت الصفحه وقال احفظ الاسم والرقم السري يا الاشدق لا يضيع منك
قلت ازهلها لا توصي حريص بس علمني وش اسوي
قال هذا جهاز عبارة عن كيت وكيت وكيت وعلمني محتويات الشاشه وكيف امسك الماوس
وقال هذا ايميلك اذا بغيت تعطيه احد يراسلك عليه واذا بغيت تفتحه بعدين تروح لكيت وكيت وشرح لي الفلبيني والله ماقصر
فتحت صفحة الايميل حقي وانبسطت لانه جاني رساله جديده يرحبون بي خخخخ
وانتفخ راس وصرت كاني انجزت عمل جبار
وفعلا كانت مهمه وتجربه بالنسبه لي
وبعدها قلت للفلبيني شكرا لك 
باقي على الوقت وينتهي ربع ساعه
قلت خليني اطق طق مثل الشباب يعنني اعرف الكمبيوتر
وجلست اطق طق
مره اقفل ايميلي ومره افتحه عشان اتعلم عليه وتدربت عليه
ومابهذلني الا الماوس ( الفاره ) بهذلتني
طفشني السهم مره يروح يمين ومره شمال غصبا اتحكم فيه ويدي ترقل وماسك الماوس
وانت تخيلوا الموقف
وبعدها بكم يوم صرت قوي في مسك الفاره
وصرت ادخل على الانتر نت
واهم شي ادخل على عنواني البريدي الهوت ميل
ابي اشوف احد ارسل لي رساله 
وشوي شوي صرت ابحر في عالم الانتر نت
وصرت اعطي الزملاء عنواني يعنني عندي ايميل
وكنت اذا بغيت اكتب اي عنوان ابداء ب WWW نقطه وبعدها اكتب العنوان من ورقه
معاناة
بعض الاحيان اجلس نصف ساعه اكتب عنوان ولايفتح
الين تعرفت على الجد قوقل الله يوفقه انقذني
وتعلمت كيف ادخل الشات والمنتديات
وتعلمت كيف اكتب على الكي بورد
وها انا الان بعد الخبره الطويله صرت بينكم
فابغاكم تقولون لي قصتكم مع الكمبيوتر منذو البدايه لاتستحون ترا الوضع عادي جدا
والله يسعدكم
انتظركم
ـــــــــــــــــــــــــــــــــــــ
التعديل الأخير تم بواسطة الراس الصغير ; 27-05-2011 الساعة 05:59 AM.
|