[ابن روزه]

قصيدة للحين ماشفتي

للشاعر علي الخزمري



للحين ما شفتي من الخزمري شي
صبرك.. ترى الدنيا عبر وامتحانات
كنتي قبل عامين والا اكثر شوي
تمشين درب الحب مشي المعاقات
ويوم طحتي مالقيتي سوى ايديّ
ترسم لك بدرب المحبه طرقات
يا واهمه مالك وللشمس والضي
خفاش ليل ومسكنك في العتامات
بعد الوفا كلتي لحم حبنا نيّ
حتى كلاب الليل قفّت معيفات
صدمة غرامك مالها شبه او زي
كنك نهايه جت بدون البدايات
اخس حاجه يوم تسكن مع الفي
وتنسى ان عقب الفيّ قدح الفلاشات
لا واحسايف كيف حي قهر حي
وصار الوفا بالحب ضمن الخرافات
استغفر الله ليتني معرف الغّي
ولا مشيت بسيرة اهل الغوايات
واحسرتي من عمري اللي انطوى طي
واصبحت اخاف من الليال الجديدات
الهم طاويني وجرح الدهر فيّ
وشلون ابسلى عن عذاب المعاناة
واللي كوتني خبروها ترى الكي
هو عاقبتها لو تطول المسافات
يارب ترحمني وانا حالتي ذي
حالة فقير وجا يدور ريالات
مير البلا ماهوب قادر على شي
وايديه من جور المسافه قصيرات
عطشان ما يقدر على رشفة المي
رغم ان جاره كل بيته بحيرات
اعوذ بالله من هواني وانا حي
ياليتي ابلى قبل اشوف الهوانات
عشت القهر من يوم مديت بيدي
ورسمت لي بيدي درب النهايات
والحين شاف الخزمري بالهوى شي
لو شافه من اول تجاهله بسكات