[نسيم السروات]

اقتباس: المشاركة الأصلية كتبت بواسطة براااق الحـــازم      . . طيب يا خاله مصباح *.. انا موافق... ومالو يا قلبي ترى معندي مانع اني اطبع هذا التصريح واعطيه لام معاذ, وربنا كريم . الزفه من الاساس فوق راس هذا المسكين من زمان. شوف سبحان الله يا مؤمن الولد ينزل من بطن امه يبكي ... والبنت تغطرف. وكان الله بالسر عليم. انت فكرك الضعيف زين العابدين والا حسني مبارك, انكرشوا من الحكم من شويه. بسلامة ليلي وسوزان. لما صدقوهم الدلوخ لصقوا في ضهورهم زي فتلت شاهي اللبتون لما تلصق بالجدران.. ضاع الشعب والدولة. [mark=#ffdd00]لكن في المقابل..[/mark] لنا شروطنا يا خاله مصباح. توقعون على تعهد طويل الامد يضمن حقوقنا نحد الصامدين من باب المساوات في الحقوق ـ والا انتو بس اللى طالعين فيها هذي اليومين. 1ـ تبلعون هوى اثناء بقاء الزوج في المنزل ـ وتسيبون خلق الله في حالهم .. جارتكم سافرت. " مع السلامة" .. بنت عمك والا قريبتك تطلقت . " بالناقص " .. اهلك قالوا وزودوا.. وزوجة اخوك والا اختك, مدري وشبهم علي. " الله على النق ـ سيبوا الناس في حالهم, يعني من زين طبعك" 2 ـ لا تميلحون في الطلعة والنزله كلما رحتوا زواج والا حفلة .. " انا انخطبت اليوم يا بوفلان ثلاث مرات .. وكلهم يا بو فلان يقولون تصدقين انك اصغر من العروسة ـ وما شاء الله عليك كن ما عندك عيال" الله على الموال ـ نسمعه من اول سنة زواج لحدت ما تطيح سنونها وهي في الثمانين. اخيرا... 3ـ اذا دورنا على القصاص عشان نقص أظافيرنا نحصله مو كل اسبوع لنا قصاص . نفسي افهم ليه الحريم يضيعون القصاص من الادراج ـ ليه احنا قاعدين نربي بساس .؟ [mark=#ff00bb]عند عدم التزام الزوجة بهذا الشرط[/mark] ـ يحق للزوج اقتطاع يوم [mark=#ffd500]الاربعاء والخميس والجمعة[/mark] بالكامل .. هذا عدى خروجه مساء يوم [mark=#ffea00]الاحد والاثنين والثلاثاء من الخامسة عصرا الى الواحدة صباحا[/mark] ـ كاستراحة محارب ونوع من النقاهة خارج المنزل و لتفريع ما علق بذاكرته من القطيعة بخلق الله.. والملاحه اللى مالها داعي. عرفتوا الحين ليش نهج من البيوت هاهـ يا خاله مصباح... نوقع والا تفكرون ؟؟؟؟ ــــــــــــــــــــــــــ * خاله مصباح ـ جارتنا في حي الزاهر بمكه من زمان ـ ست مكاوية اصيلة الله يمسيها بالخير" ان كانت عايشه ـ ويرحمها ان كان ماتت ", كانت تمشي عم اسماعيل على العجين ما يلخبطوش. كانت تسوى كل شغل البيت حتي انها هي اللى تشتري التميس, وتفاصل مع العمال ـ ويوم كبرت وجها شلل نصفي ـ قام عم اسماعيل تزوج عليها وساب لها البيت وهج مع الجديدة.

اهاهـ طلعت جارتكم الخالة مصباح جالسه أسأل نفسي من هي الخالة مصباح .

والله أني أحس أنها قدعة مصباح هذه وختم لها عمو أسماعيل بخاتمة شينة بعد رجولتها الفذة في خدمته الرخمي

أفا عليه لكن ما لومة هذا طبع الرجال الله يخارجنا منهم على خير .

ومسوي تصريح يابراق هاه ياشين التقليد وكان

خلاص موافقين على شروطكم بسيطة جداً ماعدا القصاص صعبه علينا ولكن عندي طريقة حلوة وفكرة زينة

وهي على كل زوجة أن تعلق في رقبة زوجها كيس فوق صدرة وتضع فيه حاجاته الخاصة مثل القصاص

والنظارة والمسواك ومفتاح السيارة والجوال والعقال عشان خلاص ماعد يبلشها تجلس تدور له كنه أعمى ما يشوف

المشكلة أنه هو اللي يضيع الحاجات ويجلس يمتحن الضعيفه فين هذا وفين ذاك

ولكن لنا شروط على موافقتنا على تصريحكم .

1- إذا لزمتوا البيت خلوكم عاقلين هادين رولاكس بدون رفع الصوت على الشاردة والواردة .

2- الجوال يتقفل أو يوضع على الصامت وعدم محادثة الزملاء والأصدقاء بحضرة الزوجة .

3 - عدم تفقد اللمبات والمكيفات الشغالة وصنابير الماء اللي تنقط للبحث عن مشكلة .

4- عدم الدخول معبسين الوجوه في وجه الزوجة على أثر مضائقات صارت لك برى البيت , ماذنب الزوجة تفش

خلقك في وجهها

5- عدم سؤوال الزوجة عن القصاص أو أي شئ من حاجاتك الخاصة أبحث عنها في الكيس اللي معلق فوق صدرك

6- لا تتعدل في الطعام المقدم لك كل وأنت ساكت حتى لو كان الطعام صمخة ملح تحمد الله يكفي تعبها اللي قضته في

المطبخ تطبخ وتنفخ ويا كثر المطاعم إذا ماعجبك .
7- تساعدها بالعيال اللي يبغى رضاعة ترضعه واللي يبغى نوم نومه ما تجلس تتفرج عليها وهي في مهاوشة معهم .

هناك أمور كثيرة ولكن أعطي أخواتي العضوات فرصة للتكملة .

فينكن يابنات تعلن هلم وردين تراني تعبت فيهم ذولا والتصريح أحدث صيحة عنيفة لديهم .