[منبع الطيب]

الله يحييك يانسيم والحمدلله على رجعتك بالسلامه من اجازتك
والله يعينك على الصيام بحر الرياض
اشكرك اختي العزيزه على دعوتك الكريمه



الله على ذكريات زمان
ورمضان زمان
وعيد زمان
الله يسقي

ما شاء الله الاخوان ما قصروا ذكرونا بايام حلوه الله يحفظهم

طبعاَ الذكريات حول بعض ولا تختلف كثير عن بعضها إلا في اشياء بسيطه .

بالنسبه لي .. انا ذكرياتي كانت بالرياض بحكم ولادتي وطفولتي بها
ومما اذكره وانا صغير كنا نعيش بحاره شعبيه وكل الجيران قلوبهم على بعض رغم اختلاف اجناسهم وكان وقت العصريه من اهم الاوقات عندي للعب مع اطفال الجيران حول البيت وزي ما ذكر ابويزن كنا نموت في شيئ اسمه كوره نلعب طول العصريه ونرجع قبل المغرب بشوي واحنا واصلين حدنا من الجوع والعطش والغريب اننا كنا نكمل صومنا الى الاذان ..

من الاشياء اللي اذكرها ايضاَ .. والدتي ربي يعطيها الصحة والعافيه كانت تفتح التلفزيون قبل اذان المغرب بدقايق عشان تشوف وتسمع اعلان حلول وقت الافطار من القناة الاولى :
( نود ان نلفت عناية السادة المشاهدين الى انه قد حان الان موعد اذان صلاة المغرب حسب التوقيت المحلي لمدينة الرياض وعلى ما جاورها مراعاة فارق التوقيت ) >> زمان يا فن
ورغم الاعلان الرسمي من التلفزيون إلا ان الوالده كانت ترسلنا الى سطح البيت وتقول اذا سمعتوا الاذان علمونا للتأكيد >> شفتوا الحرص كيف

وبالليل بعد صلاة التراويح هاتك يالعب مع عيال الحاره يا كوره يا بالسياكل يا كيرم يا سبع الحجر يا مصاقيل اذا تعرفوها وهي (البراجون) كور زجاجيه صغيره جداَ ملونه تلعب على الارض بوجود حفره صغيره للتهديف
والله اننا كنا نسوي دوري بين الحواري على هاللعبه انا وعيال
حارتنا مع الحارات الثانيه ونرجع أخر الليل يومياَ ومعنا علبة نيدو الكبيره مليانه من المصاقيل وهذه غلة اليوم ونوزعها على الفريق وكنت انا واخوي واثنين معنا ..

هذا اللي جاء ببالي الحين

ايام حلوه لا يمكن انها تنسي ابداَ
مشكوووره نسيم على الفكره الحلوه