[ابن روزه]

وهذه القصه قديمه لها اربعين سنه او اكثر
هذا شخص يقال له ابو منصوركان له بيت طين في الرياض مؤجره على شخص من الباديه مستور الحال وله اولاد ولايعلم بالحال الا الله
وبعدما حل الاجار على ذلك الشخص ذهب اليه ابومنصور يستافي منه الكروه كما تسمى بالسابق وهي قيمة الايجار
وصل ابو منصور ودق الباب وخرج له صاحب البيت المستاجر وقال انتظرني الى نهايه الشهر اسدد لك الايجار وكان باقي على نهايه الشهر عشره ايام تقريبا فقال الله ابشر
نهايه الشهر قريب
وانصرف من عنده وهو راضي بالموعد وبعد نهايه الشهر رجع ابو منصور الى المستاجر
حسب الموعد ودق الباب وردوا عليه اهل البيت وين فلان قالوا له فلان غير موجود
قال بلغوه سلامي وقولوا له ابومنصور جاء على الموعد وانصرف
الضعيف المستاجر موجود ولكن مافي مخباته ولا ريال واحد وخجل يطلع للرجال
وبعد اسبوع اواسبوعين رجع ابو منصور الى المستاجر ودق الباب وين فلان ردوا عليه فلان غير موجود قال وصلوا له سلامي وقولوا له ابومنصور مر عليك وانصرف
هالرجال المستأجر وده يسدد بس مخابيه فاضيه ماعنده شي واخذ على هذه الحال مدة طويله ولم يسدد صار ماعاد يجي للبيت الا قليل لعل يدور له سلف يقدر يسدد وهو لو قابل ابو منصور وتعذر له او علمه بالحقيقه كان زانت اموره
وفي يوم من الايام رجع ابو منصور الى بيت الرجل وقال وين فلان قالوا اهل البيت
فلان ماهو موجود ولكن اعطانا هذا الضرف وقال اعطوه ابو منصور اذا جاء
اخذ ابو منصور الضرف قال يمكن الايجار
وعندما فتحه وجد فيه ورقه مكتوب فيها
القلب سج وسجة القلب غربال ,,, ياما نصحته ولا يطيع النصيحه
ياعاذلين القلب مايطيع عذال ,,, مايطيعكم وقلوبكم مستريحه
ياليت ابو منصور يدري عن الحال ,,, والله لن يفزع للقلوب الجريحه
وهي اطول من ذلك
وعندما قرأها ابومنصور اخذها وانصرف وبعد كم يوم رجع ابومنصور للرجال في بيته في الصباح ودق الباب وفتح له الرجال ولا هذا ابو منصور العين بالعين
سلم عليه ابو منصور وقلطه وصب له فنجال قهوه ولم يتطرق الى الايجار
قال ابو منصور للرجل انا ماجيتك ابي الايجار بس ابيك تشهد معي في المحكمه
فقال الرجل ابشر ابروح معك
الرجال ايقن ان ابو منصور يبي يشتكيه بالمحكمه دخل الرجل الى اهله واخبرهم انه رايح للمحكمه اذا تاخر ترى الامور مايحتاج
وصلوا للمحكمه ولكن الرجال تفاجاء ان ابو منصور يفرغ البيت بأسم المستاجر
وقال له هذا البيت ملكك ولن تدفع الايجار بعد اليوم
لم يصدق هذا الرجل بأن البيت سوف يكون ملكه وشكر ابو منصور على صنعته ودعى الله له بالتوفيق وانصرف ابو منصور وانصرف هذا الرجل وهو يحمل صك هذا البيت
رحمك الله ياأبا منصور واسكنك فسيح جناته
من فرج على الناس كربة من كرب الدنيا فرج الله غنه كربة من كرب يوم القيامه
=
منقوله