[~ انثـــى ~]

السلام عليكم ورحمه الله وبركاته

راح اتكلم عن تجربتي الشخصيه والقصيره في مجال البحث عن عمل رغم اني حديثه تخرج

انا تخرجت من قسم قليل يدخلونه بالنسبه للبنات يعني الاغلبيه في مجال العمل ( ذكور - والاغلبيه منهم اجانب يعني حتى مو سعوديين ) وهو تخصص اداري

وكنت اتوقع اني بمجرد اتخرج راح القى وظيفه الاحلام حتى لو كانت بقطاع خاص لان القطاع الحكومي في مجالي يوظف الذكور بالاغلب

على الرغم اني اجتهدت وتخرجت بمرتبه الشرف .. والحمدلله

راح اكلمكم عن الوظائف اللي شفتها

وظيفه دوامها من 8 الى 5 .. كل يوم ويوم الخميس من 8 الى 1 .. وتخيلوا بعد هذا التعب كم الراتب ؟؟؟

3300 فقط ؟!!!!

هذا وانا بكالريوس

طبعا رفضت العمل معهم لانه استغلال

الوظيفه الثانيه

بمعهد نسائي اعمل فيه كمدربه .. ( معلمه للطالبات عشان ياخذون دبلوم ودورات )

ساعات العمل من 8 الى 4

كم محاضره باليوم يا استاذه ؟؟ قالت لي 5 محاضرات في اليوم المحاضره الوحده ساعه الى ربع

ماشاء الله وانتبهوا تخصصي صعب ويمكن يمسكوني اكثر من ماده

كم الراتب طيب ؟؟

3000 فقط ؟!!!!!!

بالله يسوى ؟ هذا مو استغلااااااااااااااااااااااال

طبعا رفضت

الوظيفه الثالثه استبشرت بالخير فيها وقلت يلااااا جاك الفرج

وظيفه بمكان راقي في شركه ببرج راقي ووو

الدوام من 7 ونص الى 3 ونص
مافي دوام خميس
الراتب 4000

وقلت لهم موافقه وسويت المقابله وقبلوني للعمل فورا
بس قلبي مو متطمن بيئه العمل اشبه ماتكون اختلاط
ماتطمنت ابدا لي مكتب خاص مع موظفه اخرى ومسكرين المكان علينا قلت يعني ان شاء الله مو اختلاط بس وين الموظفه الثانيه يامدير ؟ قال لي غايبه قلت طيب وين السكرتيره قال داخل قلت طيب وين مدير الشركه نفسه قال سبحان الله غايب ومسافر

عورني قلبي .. واسلوب المسؤول ( من جنسيه عربيه ) معاي بالتلفون ماعجبني انا جاده وكلمه ورد غطاها وهو يطول السالفه كان الراتب 3500 فجأه كلمني قال بخلي المدير يسوي راتبك 4000 قلت له شكرا قلت طيب في زياده بعدين والا لا قال على حسب قلت حسب تقييم العمل ؟ قال لا العمل سهل قلت حسب ايش يعني قال حسب انتي ؟!!!! مافهمت وش يقصد ولاحبيت اخوض معه بجدال ولا ابي اظلمه بس كلامه ماريحني

المهم قبل لا اتوظف عندهم بيوم طبيت عليهم مع اختي بشكل مفاجأ عشان اشوف العمل وبيئه العمل كيف دخلت اختي وصارت تشوف وراحت للموظفه اللي معاي بالمكتب ولقت الباب مفتوح والبنت اصلا كاشفه ونص كيلو ميك اب وانا وحده منقبه .. يعني اختلاط الباب حطوه عذر بس ... طيب ياهانم كيف العمل ؟؟ قالت الموظفه مادري مادري وكل شئ مادري قالت اختي طيب وين حمام النساء قالت هناك ( عند المدخل ) ماشاء الله

وطبعا في المدخل اذكر مقابلتي كان فيه سعوديين على الكنب بس شافوني قعدوا يعدلون الغتر ويصلحون قعدتهم ويترززون مع اني محتشمه وكنت مع اخوي بس شنقول بعد

ماتخيلت نفسي اتوظف بمكان زي كذا صرت ما انام الليل افكر اقول يمكن فرصه واضيعهها لاني ماعندي لغه انقلش تمام ولا عندي خبره لاني حديثه تخرج ويمكن اتوظف وما ارتاح

لا نسيت اقولكم ( غرفه الاجتماعات مختلطه )

طبعا صرت اهوجس لو سلمني المدير ورقه او شئ كيف اخذها من يده يمكن يدي تلامس يده يمكن يمكن يمكن وانا وحده استحي بصراحه ومو متعوده على هالاجواء

المهم كلمتهم امي امس وقالت لا بنتي مابتتوظف عندكم


طبعا في مقابلات انا مارحتها اصلا من اسلوب المتصل اللي يخوف .. وطريقتهم بالكلام بالرغم اني جديه بس يسولفون كنهم يدورون صيده مب يبون موظفه مثل .. اللي يقول متى تحبين المقابله قلت الليل ( على اساس ابوي متفرغ ويرافقني ) قال الليل كم يعني .. انا من الارتباك اقول الليل > انا قصدي 6 او 7 .. قال هو : يعني 1 او 2 الليل ؟!!!!

طبعا سحبت عليه هو واسلوبه الخايس ولا رحت المقابله


اااااه ياشهادتي بس راح ابروزها بجنب المرايه .. وتمر السنين واراقب تجاعيد وجهي وتاريخ الشهاده ....

انا حاليا يأست وماعاد ادور

ليه الاستغلال هذا .. جامعيه بدوام 8 ساعات في اليوم الراتب في احسن الاحوال 3000 ودوام خميس وليه مايكون فيه اهتمام بان الوظائف النسائيه تكون بمكان منفصل تمااااااما مع ان القانون يقول هالشئ ويشترط هالشئ

ابي ارائكم في الاستغلال ذا .. وادعوا لبنيتكم ..