[ابن روزه]

جيت الطبيب وقلت انـا انسـان مرضـان
وفحص علي وقال فيك قرحة و قولـون

وجاب الحبوب أصناف واشكال والـوان
وقـال خـذ هـذي قلـت مــا نــي بمجـنـون

قال انـت تلعـب ؟ قلـت مـا نـي بسكـران
آكــل حـبـوب(ن) جبتـهـا مـلـي كـرتــون

وروّحـت مـن عنـده معـصّـب و زعــلان
وجيـت المطـوع وقـال خـذ زيـت زيتـون

قلـت السبـب ؟ قـال انـت بالحيـل تعـبـان
عنـدك قلـق ومصارعـة جــن و عـيـون

قــلــت الله أكــبــر يـامـطــوع سـلـيـمـان
يالـلـي تبـيـع الـزيـت والـنـاس يـشـرون

يمـديـك مــن بيـعـه مطـنـطـخ وفـسـقـان
وعـدّا رصيـدك فــوق عشـريـن ملـيـون

قال انت صاحي ؟ قلت صاحي يا وجعان
إنــت و طبيـبـك كـــل ابـوكــم تهـلـسـون

انــا بـلايـا مــن هــوى خـــدر الاعـيــان
اشحـن غـلاه وخاطـري مـنـه مشـحـون

اتـــلا الـعـهـد بـــه يـــوم روّح مـسـيّـان
عصريـة الجمعـة عـلـى جـيـب صـالـون

جـيـتـه مـوقّــف عــنــد كــبــري بـنـبــان
فــي جيبـهـم تهـريـب عـلـبـة دركـســون

وعطيتهـم جيـك(ن) مـن الـزيـت ملـيـان
وقـالــوا نـبــي نعـطـيـك رقـــم التـلـفـون

وفـطـن لــي الـسـواق والـعـلـم نـيـشـان
قال امـش !! قلـت ابنتظـر ليـن تمشـون

وتابعتـهـم والجـيـب مـسـرع وعـجــلان
اظـنـهــم بــاحــدى الـمـحـطـات يـقـفــون

وعلى مغيـب الشمـس مـع وقـت الآذان
قـلــت انـهــم فـــي ام ســـدرة يـصـلــون

سـريـت مـعـهـم لـيــن وزّن لـــي آبـــان
ولـفـيــت لـلـبـتــراء وعــيّـــوا يـلــفــون

واخـذت رقـم الجيـب ابـي مـنـه عـقـلان
وروابــع المـشـتـاق مـــن دونـهــم دون