لرضاك تسهر عيون بدمعهــــا مـــا تنوم
وتصبح وعبدك سهير لطاعتــك مـــا رقد
العبــد لجــلك يصــوم ولجـل عفوك يقـوم
ويسبحــك فــي صــلاته لا ركـــع لا سجد
يـــا ربــي العبــد لو كـــــابر لنفسه ظلوم
فــي يـــوم يــرجع ويستغفرك مهمـــا بعد
وانـــا من العـــام ضايق خاطري ومهموم
اصبر واكــابر وقلبــي مــا يطيــق الجــلد
وازل مثـل البشر مـــاني بشخص معصوم
نفســي عــن المعصيــه تـجـزر ومره تمد
يــا كثر ما قمت اعاتب في ضميري والوم
ويـــا كثر ماسهرت عيني يوم غيري هجد
احيان الـــوم الزمن واحيـــان الوم العزوم
لا قصــرت بــي وخــلتــنــي بـهــمّ وكبـــد
واحيـــان اعـاتب قـــراراتـي وحلو الحلوم
واحيــان اعيّــب نصيبـي من زمـان المهد
احس كن المســـا والصبح ضدي خصــوم
واحــس كنــي رهيـــن لضيقتـــي لـــــلأبد
يـــا كـم توحدت فـــي نفسي وجبت العلوم
الين ضـــاقت علــى نفـــســي حـــدود البلد
ويا كم تحاشيت من ضرب العدا والسهوم
كـــنـــي بغــــزوة بـدر والا بـغــزوة اُحـــد
واليوم ضاق الفضا والكون ضيق الهدوم
وبكيــت مـن ضيقتــي كنــي بوسط الاحد
وقـــامت سوات النسور هموم بقعا تحوم
مــا كني الا فريسه طحــت بـــايدين اسد
يــا ربــي استغفـرك واتوب لك يا رحوم
من كـــل ذنــبٍ جنيتــه بــــالخطا والعمد
واعـوذ بك واتقي من شر نفسي واشوم
عن زلتـــي جعلـني من من شكرك وحمد
واعوذ بــك من عذاب القبر واهوال يوم
الحشـر لا جفــت الاقـــلام يــوم الـــوعد