[الفقير الي ربه]

يالي سلبت الروح رايح بها وين
ارحم اسيرك دامك اليوم قاضي

انت الذي تملك جميع الدواوين
تحكم وحكمك ماعليه اعتراضي

الله على صدك كواني بنارين
نار الغرام وجمر يحرق وفاضي

من شافني قال انت ضمن المحازين
جسمك نحل والعظم فيه انتفاضي

ليش الزعل بالله ياناعس العين
قل لي متى بالقاك ياترف راضي

روحي تحبك قبل تزعل وها الحين
هذا هو الواقع وخط افتراضي

صوبتني من لحظ عينك بسيفين
واوردتني للموت بين الحياضي

من طول هجرك حل بالقلب جرحين
جرحٍ صويب وجرح فيه انتقاضي

قالوا لي اصحابي تعالج في الصين
او سافر اليابان لو باقتراضي

قلت اتركوني مابي الا هوى الزين
حبه دواي ومايفيد التغاضي

لكن دام انه تناساك ياعين
واختار هجرانك وبك جرح جاضي

ياعين كفي الدمع لاعاد تبكين
واعتْبْرْي ان الوصل ياعين ماضي
============
ألشاعر فلاح بن منشار