اصعب موقف
انا في الرياض ويوم من الايام بعد العصر في الربيع العام الماضي كنت طالع للثمامه مع الاهل
كان الجو روعه غيم ورش مطر خفيف المهم جو في غاية الروعه قلنا نطلع نتمشى ونستمتع بالاجواء ..
في الطريق للثمامه بعدما تعديت المطار وحنا في الطريق من المطار لمزرعة خزام شوي اشوف عج جاي من جهة
الثمامه وربي كنها جبال جايه وشي مرعب في اقل من دقيقه وصلنا العج للطريق ومعه مطر غزير وهواء قوي ..
طبعا قلت للاهل مافي امل الثمامه الجو مايساعد وقررت اديور ونرجع البيت بس المصيبه اني ما اشوف الطريق
من قوة الهواء والعج ومن شدة المطر ولا متر قدام ..
الهواء يدف في السياره بقوه لدرجة وصلت لمرحله انتظر بس متى تنقلب السياره والعج والطين يضرب في القزاز
والابواب كأن احد يرمي السياره وصوتها مرعب والمساحات ماتلحق من قوة الطين والمطر بعدين ماادري
وش قدامي وين متجه ماني عارف والمصيبه ما اقدر اوقف وسط الطريق قلت اكيد احد بيصدمني ونروح فيها ..
الحين في السياره ماتسمع الربع الا اللي يبكي واللي يدعي بقوه واللي يصيح والصغيرين اللي معنا مافي الا
قوة بكاءيعني حوسه وقلق وارتباك وماتشوف شي وتخاف تمشي وتخاف توقف وانا قلبي من الداخل خايف
بس ما حاولت اخوف الاهل فشله الكبير والسواق وماينفع احراج ..
قعدت افكر واحوس وانا ماشي اقل من مهلي ومولع النور العالي وماتشوف شي كنك وسط الليل وشوي شوي
واخذت اخر الطريق من اليسار لين بديت اشوف الخط الاصفر ويالله خفيف وقمت امشي عليه شوي امشي صح
وشوي احك بالرصيف لين وصلت الدوار .. المعاناه ذي تقريبا نص ساعه والطريق مايجي كيلو واحد بس تبي توقف
مافي امل ماتشوف شي ورجعت من نفس الطريق وهاتك يامعاناه وياصياح ويابكى من اللي معي ونفس معناة
الروحه وصراحه تعرفون الواحد من شدة الخوف احيانا يسترجع شريط الحياه بسرعه وخلاص يحتري الاجل وشوي
شوي وبعد يمكن نص ساعه ثانيه وصلت للمطار واوقف في النفق اللي تمر عليه الطائرات يمكن ساعه
لين تحسن الجو وارتاحت النفوس وواصلنا الرحله للبيت ..
من بعدها صارت الطلعه للثمامه عند الاهل فوبيا .. وسلامتكم