[بعيثرانه]

تقول كهلتنا الحبيبة سعديه

.

انا يابنتي عشت محذفنبي نشيت يتيمه وامي وابي احيا

ابي طلق امي وانا ارضع وطردوها جداني وخذوني منها وتربيت على ايد جدتي الله واليها وراعيها , ابي كان مغصوب على امي

خذها حشمت جداني ولا كود انها تلد بي وسرحها .. وتربيت مع ابي وجداني وكنت مدلعه معهم لكن ينصرم قلبي الى شفت البٌنتات مع امهاتهن وانا

ماصطى افلح عند امي والى افلحت قعدت اتسلبى جنوب الجدارن حتى واعدي عندها تاهب لي لقمه قرص وإلا شوه عُصره ماكانوا عولها يلاموني

يطردوني مابعد عديت مالثمه وهي الله يسامحها ماتزيد تهري فيه وإلا تزيد تلمح لي

الله يخلي اهلي ماعليه خلاف من كل شئ كنت من احسن البنات في الالباس واكلنا مالغالي مايجي الى من جده

ولا نعرف السيال وإلا الحُبان الدخه ذي وقت الرخاصه , ابي كان معه قلاب وابسطنا في الرزق

كان يفلح الى جده ويجمع من كل مايمتني الخاطر وماكان حد يعرف المعلبات فالدار قبلنا حتى بيت العريفه وهو عريفه ماكان في بيته كما مافي بيتنا

تنك الحلاوى الطحينيه وتنك التمر والرز والسكر والشاهي ماكان يجيبه ابي إلا بالاكياس والصناديق والنانس والقها والصلصه وكل مايمتني الخاطر

وفي طرف الدار كان فيه بنت هيله جهدا طويله بيضاء شعرها الى مثناتها تهول من يلمح فيها سنونها كما حب اللول وخشمها سلة سيف

وكانوا شباب القريه يتمنون نظره منها وإلا كلمه تزوجت مغصوبه ولا صبرت وتطلقت كانت في الوادي جمل ماحد يغلبها في القصاب ولافي الحزام

ولافي الصرم ولا الدياس والله والله يابنتي الى استلمت العمل من ابوها انها تدك الغابره بارجولها من براعتها وقوة باسها والى فلحت الريع تتحطب

ياحزمتها انها غير عن حزم النسوان والى خبطتبها فالحاره يامصاريع الباب انها ترقل مالخبطه والى جاء صده ولا العيد ان بنات الدار زيه وهي زيه

والى خذت الدف وحامت به انك تقولين ان الله بالمنى انها ماتوقف والى شلت بالصوت إنا نفغر فيها من حُسن صوتها وهيالة طرقها

ابوها غني والغني الله لكن شحيح مايصخى ...ـلحه ( كرمتم ) ولو مايوزيه مايخرجه

ويحلفون للقيوا بعد موته جحالة الفرانسي والعربي مدفونه في العلو

هافهمتي .. وهي بعد ماتطلقت وانا قاعدة تحت المشمشه اتلاعب مع البنتات ولا دريت إلا وهي مشرفه من فوق صفا جنب بيتهم وتناديني

وافلحت اسعى قليزي كني جراده فوق العضدان والزُبُر وهي يوم مدت لي بكفكيرة مليانه حقينه تقول اعطيها ابوك في ايده

والله لاهب اذاني واذانك اربع لن حد شربها غيره وافلحت اسعى بها وانا اسعى واسمع صفير رج الوادي واحتسيت

انه حد مالعزبان يرد الغنم مالريع ... مديت بالكفكيره لابي وشربها وناداني ورديتوها لها

واهي يمه كل يومين ثلاثه تناديني افلح بكفكيرة الرحمان لابي وهو يشربها وانا اردها ..

وكل ماشتليت ذيك الكفكيره والصفريقه ورايه


خذنا لنا ميمه وانحم على ذيه الحال .. وفي يوم رمضان سافر ابي جدة ولاحد درى به من الجماعه وكانوا جداني يغصبوني

اصوم وانا والله اني جاهله ولانا في حقت الصيام , وكنت اضحك على جدتي وادخل علو الارزاق ولا اخرج إلا وانا شابعه

اتقلع الجليم واكله وافقع حق النانس بمسمار من قعره لاحد يدري به وانتشف مايه واختذم لي ملا ايدي حلاوى طحينه ولا اخرج إلا وانا اتهاير

مالفقعه والى جاء المغرب صاح جدي على جدتي حسبك الله نجفي عالضعيفه اهلكتيها جوع مابعد يحق لها بالصيام

غير ذا اكله في الاوديه منه قرط عنب ومنه حبه خوخه وإلا مشمشه ومنه عذق حبش ومنه شوه خلفه وإلا سنفين جدر

ودرت جدتي بسرقاتي وهبت فيه يوم يتورخ داستني لين طرشت حليب امي ذا ماتهنيت به وصكت العلو وعلقت المفتاح في حلقها

وهلكت جوع ماهلا ذا فالاوديه وانا ماسمع في الحلاوى الطحينيه والى ذلحين يابنتي منحي السكر عدى بي

ايووووووووووووه وذا كنت اقولك ... ايوه سافر ابي في رمضان ولا درت رفيقته ونادتني وانا ماكودت افلحت اسعى هبتوها

وحده ثنتين ولا ونيت إلا تحت بيتهم اعطتني الكفكيره وخذتوها وافلحت كما البارق ادور لي حده ادرق فيها والصفرقه ورايه

واقتبع كفكيرة ابي ويوم بيحتوها إلا والله ان شئ صكيع فالكفكره

افتح الطباقه إلا واربع ريال فرانسي مرصوصه في قعر الكفكيره وبغيت افلخ فرحه

....

يتبع