[بعيثرانه]

وصلنا عند /

اقتباس: واقتبع كفكيرة ابي ويوم بيحتوها إلا والله ان شئ صكيع فالكفكره

اقتباس: افتح الطباقه إلا واربع ريال فرانسي مرصوصه في قعر الكفكيره وبغيت افلخ فرحه

ان اعطيتوها جدتي فاياويل الويل وان رديتوها مع الكفكيره فبيدري ابي ويادياس الدياس

وعذبالله من النفس وهواها دقني ابليس افلح الى عند امي صندله ( خالة ابي ) اشتري

من عندها فصفص بريال

كانوا سفانها يجيبون لها اكياس فصفص وتبيع علينا قبضة الايد بريال وهي الله واليها وراعيها تقبض ايدها على حبتين والباقي تاهبه

فوق اصابعها وهي قابضه يافات ان ايدها ملانه وتصيح قوام قوام هات طرف ثوبك وإلا لقي جيبك لا يتنثر فالحيله

وهو ماش ماهلا كُذاب ...

هبت ثلاثه ريال في حده كنا ندس مشاع شعورنا الى مشطناها فيها تدرين يابنتي كنا الى قصينا اظفارنا دفناها

والى مشطنا شعورنا دسينا المشاع فالحداد لا يشتكينا يوم القيامه انه ميت من حي الله يرحمنا ووكان

اييووووه دسيت الثلاثه وقبضت على واحد وافلحت اشتري فصفص ويوم شافت امي صندله الريال خرجت عيونها

اعطتني قبضه كُذاب فصفص تغرزت عليه في ثوبي ( التغراز بالثوب : وضع اي فاكهه او حب او فصفص في الثوب

من امام دكة السروال وثني قليل من الثوب وادخاله تحت الدكه

>> يعني جيب اصطناعي زي جيب الكنغر )

ولا وصلت البيت إلا وهي ورايه عدنا طمسه وعدت عند اختها ( جدتي ) وهي تصنع لقام للبقره ثمة الباب

واحنمن شويه وجدتي تحندر وتصرصر في براطمها ويوم خرجت اختها وتشتل شقاره طلح مالمحطبه ووين مايوجعك ياسعديه

وتحشي الريال قعر اذني منين هو لك يامقطوعة العافيه والنصيب صرقتي قروش جدك وانا احلف وهي تضرب وانا حلف وهي تدوس

ويوم شافت اني ماقريت انها قروش الشيبه قال ايووووووووه بنتك يابي اعقبي عقبا الله بك كن حد ضحك عليك ياعُبيه

ووين مايوجعني واشن ذا اعطاك القرش وانا احلف ان ماحد اعطاني ولا صدقت وفي حالها بتاهبيني لكه على اخر عمري

انا ماقلت احرزي نفسك هبهب الله على من ذراك وهبك في حلقي ولعنك ولعن من التقفك

كانت جدتي قويه حتى جدي ماكان يصطى يهرجها ونسوان الدار يتجنبنها حقانيه وقويه ولاعليها في حد

وبعد ماختلطت دموعي ....و.... واغرقت لبسي ونشب خشب الشقاره في عظامي اعترفت لها وعلمتها بذا فالحده

خذت القروش واشتلت حوكتها ولا ونت إلا في حارة ( ذهيه ) .. لقيت امها فالحاره رحبت قالت جدتي قولي لذهبه تجمع لي حزمه قصيل من سفلكم

جات ذهبه بالقصيل وعدت امها تشتف لجدتي قطعه خبزه للفطور ( رمضان ) وامسكي جدتي ذهبه بشاكلتها وتخاليها لا تسمع امها ..

قالت وعد منه الى بطن مكه وعد الحروف لن عاد وارسلتي شئ لولدي يالمجمهر ياللي فيك مايخطيك لاهبك هبهب مالك مذهب

ولاهبك لكه في اثمام خلق الله ولاخلي الشامي واليماني يقصدون بفشايلك ومناقيدك ولاعلم ابوك ياهبك سديان ..

اغدي خلق لاتحفد منك ذي مالها بك .. ذهبه بغت تموت من الخوف بس الحب غلاب انساها وش سوت فيها جدتي

شرفت امها بالخبزه واشتليها جدتي هي والقصيل وعودي

المحي ياااابنتي ... جدتي مابها إلا ابو ذهبه لا يدري ان بنته تسترق قروشه وتعطيها ابي والله قاطع الحيل ليدق عليه فالشرطه يقول استرق قروشي

وقعدنا الى بعد العيد لا حقينه ولا كفكيره ولا صفاريق .. وفي يوم وانحم فالوادي بعد العصرعدنا طمسه

ابي يفكك العداد من راس البير وجدتي طرف الفلج تغسل ثفله معها وجدي راس السهوه يربطها وياهب دراقه بالخيش

شرفت اخت ذهبه من طرف الركيب ونادت اعطتني قرص قالت هذا من عند ذهبه لابوك افزعي به قوااام

وسمعت الصفرقه

شافتني جدتي قالت هبيه فوق حوكتي وطبقي عليه حتى يقفض ابوك ..

بيحت جدتي غسيل ثفلتها وقعدت في حرى ابي والشيبه بالقهوه واشتهت القرص بنته تزيد فالعمر ,

اشتتفت منه شتفه ولا امداها تبقم عليه إلا وحطقت نااابها وانهل في ايدها ههههههههههه

فتشت القرص إلا والله قروش ابو ذهبه مرصوصه فيه

انجنت جدتي صاحت على جدي انزل استنزلوا منك ايد ورجل انت وولدك سوا وهبت فيهم ليل ادوس

ولا اصبح الصبح إلا وهي تقدم في ذهبه لابي لا ينفضحون بسرقة القروش

جدتي حاكتها في قلبها ولا نسيتها لذهبه وخلت ابي يطق بوحده فوقها انسته ذهبه وغير ذهبه

وافلح حب ذهبه وقروش ابوها فالماء والملح .. المحي ذا مالهم خاتمه يابنتي

..

القصه كما حكتها لي سعديه وعمتها ذهبه الله يحسن لهن بحسن الخاتمه ويرحم جدانها وابوها

ويرحم امواتي وامواتكم وجميع المسلمين يااارب

وعقبتني عليكم العافيه