[عبدالمجيد العدواني]

.
.

الرحيل

.
.

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
ما نويت الرحيل ولا نويت القطـاعه=ولا نويت اجحد العشره ولـو وش يصير
وحبنا ما نويت بـيوم اسبب نــزاعه=كـنت اجاهد عشان الحب يبقى كبير
وكنت افضلك عن كل الأهل والجماعه=وكـنت اشوفـك بعيني غير والناس غير
اتغاضى على ظلمك واجاهد صـراعه=واتصبر وانا ادعـي جعـل بالامر خير
ما هويتك كذا من طيش والا صيـاعه=يشهـد الله نويـت ابقى معـك للأخير
مير من صدتك جاني برود وقناعه=وخاطري منك طاب وصار دربـك عـسير
اتـحملـك وانـت تزيـد نارك بشـاعه=واتـوددك وتزيد اللاهايب سعير
كنت تامر وانا ما غير سمع ٍ وطـاعه=وكنت تنهى كما الحاكم ومثل الامير
تحسب اني ضعيف وتحسب انها شجاعه=كل ما اجيك متواضع شوي وتـطير
غيـــروك العواذل واحرموك الشفاعه=وصـرت لانت العـذول وصرت لانت العشير
شوف وشلون ليل الهم قامت سباعه=للمحبه زئير وللـمواجع زئير
تسعة اعوام مرت ساعة ٍ بعد ساعه=وانت جيشـك بصدري كل ساعه يغير
محترف في طعونك صارعندك براعه=ما تطيب الجروح الا وسيفك شهير
مير من كثر طعناتك كسبت المناعه=واكتشفت انك انت انسان ميت ضمير
كيف ترضى لمن حبك يزيد التياعه=كيف ترضى يعيش العمر مثل الضرير
وكيف تتركه للماضي وتكتب ضياعه=وكيف تحكم عليه يكون حزنه مصير
عاد انا مل صبري منك بانزع قناعه=واكشف الوجه الاخر للزمان الحقير
معك مليـت من طرد الهـوى واتباعه=وطابت النفس منك ولا بقالك غــفير
وكاسك اللي صبرت برشفته واجتراعه=باكسره دام كاسك بالمحبه مرير
ومركبي في غرامك عــاد بطوي شراعه=دام بحرك خطـير ودام موجك خطـير
وكل مينا يناديني تزايد صداعه=ويحتريني على ميناي جمع ٍغــفير
التـفت لي زماني معك عـبر وداعه=وهات قلبي وبارحل جعل دربك سفير[/poem]

.
.
.

عبدالمجيد العدواني

.
.
.