في غيابك
ماخنت يابنت الحلال العهودي
ولاني بجامع في فؤادي فؤادين
قولي لقلبك بالهوى لايجودي
ان كان ناوي يتعب القلب بعدين
ولاتقولي اخوان وقت الشدودي
واخذ بنصحك والمشوره في اللين
ابليس بالوساس ماله حدودي
حذرك منه واصحك لكيده تطيعين
والله يستر للخطأ لايقودي
ونصبح من اسبابه سوات المجانين
واخون ريمٍ كاتبٍ له عهودي
من يوم حبيته له اشهور وسنين
مافيه زولٍ عن غلاته يزودي
حبه بقلبي جاريٍ في الشرايين
في غيبته مال السعاده وجودي
كني يتيمٍ فاقد الحب مسكين
والدمع من بعّده مجرح خدودي
وشوقه طعني فالحشى بالف سكين
لأيامنا الحلوات ماني جحودي
ولا ودي اقعد عايشٍ بين نارين
وفاي والله وارثه من جدودي
ماخون خلي لوعطوني ملايين
سامي العويفي