[ابو ديالا]

ياعين لاتبكي على فايتٍ فات
مايرجع الفايت ولوك تموتين

كم عين قبلك هلت الدمع اهات
ومافادها دمع المواجع تلاوين

ملحوظة الموضوع كسر وبقايات
واللي بقا ياعين ذكرى المحبين

هذا القدر وان قال مافات قد مات
وش لي على حكم المقادير ياعين ؟

عامين عدة التعب والمشقات
عامين هم وحزن عامين عامين

اسلى بليلي و انثر الشعر ابيات
واخفي معالم دنيتي والعناوين

كني وحيد وحولي الناس وحدات
وش صابني من دونهم عشت بالشين

بكيت دمعي وانقضا الدمع نزعات
نزعات روحٍ تذكر الامس بالزين

ياعين ليه الحزن بك بات ثم بات
يكفيك حزن ارجوك تكفين تكفين

للفجر حلم ومطلع الفجر للذات
يكفيك عن دمع الشقا يوم تبكين

باكر يجي غير اللذي بالبدايات
ونعيش دنيا مثل منتي تريدين

دنيا لنا فيها من السعد بصمات
فيها لنا غالين غير القديمين

ادري صعب اشرح بقايا حسابات
وادري بعد ياعين مالا تقولين

وشلون ننسا كل ذيك المسافات؟
اللي بها ياما رسمتي على الطين

الله وكيلك يادموع النهايات
ماكان ذنبي والخطا خافي البين

انا كما حرفٍ نثر بعض كلمات
كل مابغا ينسا يشوفك تصحين

كفي الدمع واطوي من الامس صحفات
وانسي جروح الروح من لحظة الحين

وابوعدك ياعين مامن صعوبات
ابوعدك وانتي عن الوعد تدرين

لامن وعدت وكلمتي لحنها صات
هزة سيوف الوعد كل المياديين




القصيده حصريه على موقع زهران
كلمات /
والحان /
واداء /
عبدالرحمن ابراهيم الدوسي .. ابو ديالا