[ابو ثامر]

يا الله يا اللي ما ندم طلابه
تنصر جنودك من قبل لا نيّس

الشام بالبغي انهدم محرابه
والباغي امسى في البلاد يهيّس

وبيت العرب مهدوم فوق اطنابه
واللص يجمع ثروته ويكيّس

لا تخطبون المجد يا خطابه
ما دام مسؤول البلاد متيّس

كم واحدن جانا على دبابه
من خارج الدار وحكم وتريّس

وخلا المناصب كلها لاحبابه
ولخبط وزاراته وقام يديّس

وانحاز عن شعبه وقفّل بابه
وامسى يلاعب شلّته ويميّس

معميه ربي عن عيوب اصحابه
من جهله يشوف البليد كويّس

واختار له شيخ(ن) عمل لحسابه
وافتى بما يرضي غرور الريّس

والشيخ خالف ما قرا بكتابه
واصبح يطبطب للغبي ويليّس

يا أمة الإسلام وش ذا الصّابه
حتى الجهاد اليوم صار مسيّس

نمشي مع من ساقنا بركابه
من بعد ما مات الفطين الكيّس

ونرضى الهوان ونبتسم لحرابه
نظرة غرير(ن) ما يعرف يقيّس


# سعد العدواني
5 / 6 / 1434 هــ