[منتهى]

السلام عليكم ورحمة الله وبركاته

كل منا يحمل بين طيات ذاكرته بعض الأسرار التي لم يتحدث عنها قط ولم يتشاركها مع أحد لذلك أود ان أبوح بسر لطفله في مرحلة الابتدائية ...

طبعا كان من عادة الجيران زمان انهم اذا طبخوا يرسلون للجيران .. في يوم جميل مشمس الوالده طبخت الغدا وحطت لجيراننا بصحن وارسلتني عشان أوديه طبعا البيت مقابل البيت تماما وانا في قمة بسطتي اني باروح للجيران
قابلني أبوهم في الدرج وهاوشني وهزأني بدون سبب وانا مسكينه شايله الصحن بيدي طبعا رجعت للبيت حزينه وزعلانه كيف يكلمني كذا فقررت الإنتقام

لما رجعت البيت رحت لغرفة امي بسرعة وفتحت شنطة الوالد الخاصة كانت فيها اوراقه ومن ضمن الأوراق كان فيها مسدس وعلبة رصاص أخذت رصاصه وما احد يشوف الا غباري شردت لغرفتي وبعد ما تباحثت مع الشيطان عن خطتي الانتقاميه قررت أنفذها ... رحت عند سيارة جارنا وحطيت الرصاصه تحت الكفر الخلفي ياحزركم ليييييييييييش ؟
عشان اول ما تمشي السياره والكفر يجي فوق الرصاصه تنفجر السياره وتتطاير اشلائها في الهواء وبكذا اكون اخذت حقي ( الاخت متأثر بأفلام الاكشن ومقايفر اللي ودانا ورا الشمس )

المهم استنيت الناس الين تغدوا وناموا ونفذت خطتي المحششه اللي ما ادري ايش كنت شاربه يومها ورجعت للبيت بسرعه وانتظرت عند الشباك أنتظر اسمع صوت الانفجار المصيبه اني مقتنعه انها بتنفجر وانتظر وانتظر وانتظر يوم فتحت الشباك الا السياره مو فيه رحت اشوف ايش اللي حصل شكله صار عطل فني في القنبله يوم وصلت لقيت الرصاصه متساويه بالارض وخطتي فشلت ورجعت للبيت وأنا اجر اذيال الهزيمه

الأكيد في الموضوع ان الوالد ما دري بالموضوع والا كان شفت النجوم والكواكب والمجرات والنيازك بعز الظهر

بس أحس يومها كان تفكيري خارج نطاق التغطيه تماما والا هذي الافعال الارهابيه ما تصدر من بنت في الابتدائي والا ايش رايكم ؟؟؟ هههههههههههههههههه

هذا هو سري اللي الى الان ما احد يدري عنه بس ابشركم حالتي مستقره الان وما مني خوف او خطر

يالله كل واحد يتحفنا بسر ما عمره خبره لأحد والا باحط تحت كفرة كل واحد رصاصه