[فهد سعود الزهراني]

[poem=font="Simplified Arabic,5,black,bold,normal" bkcolor="transparent" bkimage="backgrounds/30.gif" border="double,3,black" type=3 line=0 align=center use=ex num="0,black""]
سلام يا قبر اصبح في خيالي مركز الكون=
يبدا منه كل شي في الضمير ينتهي له=
قبر طموحي و وجداني و عقلي فيه مدفون=
والروح ما تنتمي لي كثر ما هي تنتمي له=
قبر اللي اغنى فؤادي حبها عن كل مضنون=
احبها حب ما حد حب في الدنيا مثيله=
ياللي تعزون مشكورين لكن من تعزون=
عزيتم إنسان من قبل العزا ضيع دليله=
شخص بحكم المؤبد في سجون الحزن مسجون=
ما حد سوى الموت من زنزانته يخلي سبيله=
اي والله إني حزين الا حزين وحيل مغبون=
اشيل هم جبال الهملايا ما تشيله=
امسيت كني بجنبية لها حدين مطعون=
مطعون من فارس ينجي قبيلة من قبيلة=
لو كان مالله عصمني كنت فوق الحزن مفتون=
لاشارك الغالية في قبرها بأية وسيلة=
و الا لشقيت ثوبي والعرب يقلون مجنون=
واقول مجنون وش للعقل عندي من جميلة=
يمه والانسان بعد العز يحفر حفرة الهون=
يحن منها عدوه ثم يدخلها خليله=
كنت اكثر اللي من الحصبا على قبرك يهيلون=
واول ثياب الحرير اقول شيلوها ثقيلة =
إن جيت يا ( ميمتي ) بانساك كيف انساك وشلون=
الصبر باصبر لكن مالي على النسيان حيلة=
لا شفت وجهي على سطح المراية قلت ياعون=
من فيه ذرة شبه من والدينه يا حليله=
وانا تفاصيل وجهي كلها بالشكل واللون=
ما كن عيني تشوف الا ملامحك الأصيلة=
جبين وانف و حواجب واستدارة وجه و عيون=
انساك وانتي قبالي كل يوم وكل ليلة ؟؟=
يا يمة بعدك غسلت ايدي من الدنيا بصابون=
ضاقت علي المساحات العريضة والطويلة=
لو كان يقلون خذ مفتاح خزنة مال قارون=
لاحلف وانا بر يا عندي معد تسوى فتيلة=
يا يمة لو عشت مية عام من فرقاك محزون=
اشوفها يوم اقارنها مع حزني قليلة=
اليا تيتم طفل عند العرب مكفول مضمون=
لكن يتيم بعمري ما معه من يشتكي له=
في ذمة الله يا رمز التقى و الطهر و الصون=
ياللي من ايديك تتفجر ينابيع الفضيلة=
و الوعد في الجنة اللي تربها بالمسك معجون=
الين ذاك النهار القلب ما يشفى غليله=
و الحمد لله و لله البقاء و الموت مسنون=
والله يحسن عزانا في مصيبتنا الجليلة=
عبدالواحد=[/poem]