سلام عليكم ورحمة الله ..
عذراً بعد طول غياب
اتمنى ان يجد عذري وقصيدتي قبول بينكم
انثريني يا سما ربي برَد .. في ضواحي بيته وفي حارته
كل ذكرى معه ما عنْها مصد .. والفت شاعر على محبارته
والرسايل والهدايا والعهد .. للسهر مونه وسبّة غارته
لا بدت ساعات نومي فـ العدد .. دقت ابواب الخفوق و زارته
زايره والليل فـ يديها تمد .. ورد , مدري جمر ! ي احمرارته
والغريب اللي سكن عينه رمد .. ما لقى حيله سوى نظارته
وكلما ثارت به جروحٍ جدد .. سولف الامه على سيجارته
يا لذيذ التوت يا احلى شهد .. ويش ابي بالنحل دون عصارته
ظنت الانفاس بـ ضلوعكِ بلد .. وخابت ظنون النفس يا جارته
هذي الايام طعنتها عمَد .. والقدر راضين تحت امارته
ومن عيون الحسد لـ كفوف العقد .. كم مسافر ما عرف طيّارته
و انا متشرد ولكن ما شرد .. شايب العشرين يسكن دارته
ي الفراق اللي شرب حتى فقد .. ويا سكارى بُعد رهن اشارته
وخّروا عني انا ماني لـ احد .. انا للبحر وثمن محّارته
والله اليا قالها احدٍ صمد .. ي النمر يهنى بـ قرب غْزارته
#عبدالله_الحديبي