[محمد الساهر]

طبعا يبغا لها ترجمه خاصة من اهل مكه
وهذي بتقولها حلاوة لدو للبنات في الرحله


جبت لكم اليوم قصة كدا يعني من حكايات ستي فتو (خاصه لحلاوة لدو)
...وزي ما يقولوا كدا
قدرة ولقت غطاها ..يعني لا تقولي ابو سروال وفنيلة ولا ام ركب سود
تلفي وتدوري وتحوري وتموري وبالنهاية ترجعي تقولي ما ابغي غير ابن حارتنا ..
ايوه وانت يا واد هناك اسمع مني مالك غير بنت حارتكم تعرف
تعمل لك اكل امك وتسكت علي بلاويك وهمك ..هي كدا الدنيا قالوا ابن بطني يعرف رطني ..
فتو و ستيته توحه
هادي فتو زعلت من جوزها عباس وجات عند استيته توحه تشكي لها همها وايش عور قلبها وقالت لها يا ستيته ما ابغى هادا الرجال اللي ما يعرف يتكلم زي الخلق لسانه زي الحنش يقرص ويندس ومطبخنا ما فيه غير الدقة وشوية "مرق الهوا "بطني لصق بظهري وهو زي الجاروف ايش ما حطيت قباله يلهفوا لهف ..ونزلت دموعها زي السيول وتوحهتحاول تصبرها
قالت لها ستيته توحه " لا تزعلي وتغنبجي قلبك هما كدا جنس الرجال زي الطبل صوت عالي بس من جوه فاضي انت خليك حرمة جيبيه من هنا وهنا وخليك عكروته واعملي زي البنت التركية تميس ..
وبعدين هو رجال شقيان يبغى ياكل ويرم عظمه وانت تتقنبري طول اليوم قدام الدافور وشعرك ما تكديه زي قرون الشيطان والله عالم تغسلي يدينك من البصل والتوم واللي لا ..يعني لا تدقي في الرمرمه كلهم كدا يزطوا ويلغوا احمدك ربك انهم ما يدقوا لاحسن انت زي ما يقولوا
ست وجاريتين على قلي بيضتين.
قالت فتو في نفسها يعني انا جاية عشان تقومي معاية قمت معاه يا ستيته وكمان لميس صارت لميس زي ما تبغي يعني هو اصلا اسمها ..
لفت ودارت وقالت " بس انت ما سمعتي ايش قال عليك وطول لسانه كمان
توحه : ايش قال البعيد في خلقته العكرة ؟
فتو : قال مين توحه وايش تكون لسانه طوله مترين وصوتها تزعق من اول الزقاق اللي يسمعه يتعوذ منه الشيطان وجهها زي حبة البدنجان الاحمر و
توحه : ايش هو دا الولد خلع برقع الحيا الله يرحم امه صوتها يجيب اخر الحارة لو اخدوها تأدن كان احسن ؟
يجي وانا اعطيه في جنبه ولد السقا اللي طول لسانه علي اسياده وتاج راسه خليه يجي وانا افتق له والله عاد ..صدق من قال
دجاجة غسلت رجليها ونسيت الا عليها
يجي وانا افكره باللي كان وصار صدق من قال ..لا من خيره أعطاني و لا من شره كفاني
قالت فتو ايوة كدا يا ستيته وريه قدره ومقامه دحين ارسل الصبي يناديه وانت لا تخلي له عرق ينبض وعلي الجنبين اكويه
وصل عباس وزبط العمة وتشهد وفتل شنبه وقال غريبة دحين الصرمة والقباب صاروا اصحاب وضحك وهو يغمز بعينه
توحه : نعم ؟ مين الصرمة ومين القبقاب ومين داري عنك اللي قاعد تغمز في الظلام ..,صدق من قال لمن كنا ما كانوا ولمن رقدنا قاموا
والله وطلع لك لسان ولد معتوقة من متي شبعت بطنك اللي قد الزير غير لما عرفت بيت الاصول ؟ صدق من قال ..
-بعد ما أكل واتكا قال ريحت بيتكم مستكا.
عباس : ايش قلت لها وليه ؟ مليتي قلبها عليه ؟
انا ما اقدر علي زعلك يا استيته توحه والله بس فتو دي لسانه زي الحيه يكنس ويرش
فتو: انا لساني يكنس ويرش ؟ يا حرام البسة تأكل عشاه
لا تصدقيه دا مطول لسانه عليك وقال عليك كلام زي وشو العكر
توحه : ايوة عارفة اصلا هما كدا الرجال
كبيرهم فلفل وصغيرهم زنجبيل واللي في الكوفلة يقول من العايدين
عباس :" والله انتو ينطبق عليكم المثل عمياء تحفف مجنونه وتقولها حواجبك سودا ومقرونه ..
لا انت تعرفي تتكلمي زي العالم ولا انت تعرفي ترجعي مخها الضارب
فتو: لا والله انت اللي مالك امان سمعتك تتكلم تبغى تجيب لي ضرة
وزي ما يقولوا..عقربة في الغار ولا ضرة في الدار
ضحك عباس حتي وجعته بطنه من الضحك
قال : اخ يا بطني تفزرت من الضحك ايش تقولي انت انا اتجوز ليش مين قال لك عليه اهبل ..هي مرة ما تكرر
ضحكت فتو وقالت " خلاص يا سيدي حقك علي راسي من فوق هات ايدك ابوسها وخلينا نروح بيتنا استر لنا مو كدا ؟
نظرت توحه وقالت صدق من قال " كل حبه مسوسه لها كيال أعور.