رد: عالـــمي الخاص .. عبدالله الحديبي
بقايا حزين ..
الحزن ( ضامي في خلا ) والحشا ( بير )
ميّت عطش .. شرب وغنى شباعه "
من وين ما دوّرت لي صبح وعصير
نور وفرح .. ما شاف نوني شعاعه
و اليا اظلمت ما نام للبال تفكير
ليلي ( منبّه صبح ) مزعج سماعه
اشياء من حولي تصيرني اصير
مشغول فكر ومنهمر في ضياعه
ياليت لي جنحان و افل و اطير
واسيب ضيق القاع رغم اتساعه
الضيق من ناسٍ على ظهره تسير
ماهوب من وقتي ولاهوب قاعه
ناسٍ فـ ظاهرها محبة و تقدير
لكنّ باطنها / نفاق , و بشاعه
خلف الامام بـ صف , خشية و تكبير
وقلوبهم حقد وخصام و قطاعة
ناسٍ تردّى حالها . ما بها خير
( حسن التعامل ) في زمنها بضاعه
اللي معه مالٍ و ربعه مشاهير
لاقال . لبّوا له بـ سمعٍ وطاعه
واللي فقير و راس ماله دنانير
اليا عطوا له وجه يغسل شراعه
وجدي وجود السوري اللي فـ تفجير
عجز يقوم وطفلته في ذراعه
حاول لجل بنته و عزّم على السير
وطاح , وصدح باسم العرب / يا ضياعه
ما يدري ان القدس صاحت وكشمير
و ضميرنا من ذلّته لـ ارتياعه
( ميّت فـ صدر حياء , اصغرهم امير )
مدري متى يكشف لنا عن قناعه !!
على سنينٍ شيّبتني و انا صغير
من هول ما شافت عيوني فضاعه
وين انت ي اللي ضحكتك ضحكةٍ غير
حاجة م بين الـ أه صدق و مياعه
ي اللي الخطاوي في غيابك مشاوير
والا الشهر في حضرتك ربع ساعه
تعال بـ اقطف من شفاتك نواوير
ملّيت من جو الشعر و الاذاعه
للحزن من بعدك فـ عيني تعابير
لو كنت وحدي , او م بين الجماعه
داء الحزن م تفيد فيه العقاقير
و انا بدونك ما بقى بي مناعه
#عبدالله_الحديبي
ـــــــــــــــــــــــــــــــــــــ
|