[انا السليمي]

بسم الله الرحمن الرحيم ..

السلام عليكم ورحمة الله وبركاته ...

كالعادة وكغيري من الناس احب سوالف كبار السن حينما يتحدثون عن قصصهم وحياتهم في زمنهم الماضي .
ذات مره وانا طالع من البيت اذا بهذا الرجل كبير في السن جالس لوحده والمعكاز جنبه .قلت بروح اسلم عليه واشوف وشعنده . بعد السلام وكيف الحال . سالته عسى خير ياعمي شفيك جالس لوحدك وش تفكر فيه عسى تتذكر ايامك الحلوه ايام الصبى قال الله ياولدي مااحسن منها ايامنا والله يسقي ذيك الايام صحيح ياولدي نتعب ونشقى ولكن خُطر الناس طيبه ونتمنى لبعضنا البعض الخير ولايوجد بيننا خلاف .
قلت ليش جالس لوحدك عسى ماشر . قال ياولدي لي اربعه ايام بلياليها وانا بحاله لايعلم بها الا الله وحده . قلت عسى خير . قال جاني رجال ضيف وفرحة بغيته يتهرج معي وليته ماجاء ماغير جاب لي الهموم . وشفيه قال بعلمك وانت اسمع .
قال جاني اول ليله سولف معي شوي يقول ( شفت لك رؤيه في المنام الظاهر ماعاد بتطول وقرب اجلك )
راح من عندي وانا عايش في هموم كثييرة ادري ان الموت حق ولكن الاعمار بيد الله سبحانه .
جاني اليوم الثاني وسولف معي شوي قال( ماتدري عن فلان انه توفى قبل شهر ترى هو نفس عمرك )
راح من عندي وزادت همومي اكثر من اليوم الاول
جاني اليوم الثالث قال سبحان الله ( ماتو اهل القريه اللي بسنك ماعاد بقى الا انت حي )
راح من عندي وضاقت بي الدنيا استغفر الله .
اليوم الرابع جاني البيت قلت له اشرب القهوه والشاهي ولا كلمه بعدها توكل على الله .
وهذي سالفة الاربع الايام .
قلت له ياوالد بالعكس انت انسان طيب وبخير وتروح المسجد وتجي ونسال الله لك طولة العمر وحسن الخاتمه والاعمار بيد الله سبحانه يمكن هذا الرجل جاك يتوفى قبلك لان كل شي بإرادة الله سبحانه .
اخواني واخواتي الاعضاء الافاضل :
نشاهد بعض الناس يجلس مع شخص كبير بالسن ولايحترم هذا الرجل الذي في مقام والده او ربما في مقام جده . اما ان تكون نظرته له عفويه او معتمده .
سؤال::
عندما تجلس مع شخص كبير في السن ماذا يجب عليك عندما تتكلم وتتحاور معه .؟
هل من حق هذا الشخص ان يتكلم مع هذا الشايب بهذا الاسلوب ؟

يهمني رايكم حول الموضوع .
تحياتي للجميع