وش في دموعك بللت هالوساده
بي عنك من ضيم الحياة وتعبها
لأنهل دمعك ضاق صدر السعاده
ويبان بوجيه الخلايق غضبهــــا
والـصبح ظلم وأكتسى في سواده
والأبتسامه حزن عينك سلبهــــا
وطير السعد سهم الغرابيل صاده
وعين الأماني ماتلاقى هدبهـــــا
حتى الطفل يبكي وهو في مهاده
كنه يقول السالفه وش سببهـــــا
عطني همومك والألم والنكــــــاده
وأضحك وخل الناس تعلن طربها
وحجاجك المعقود حرر قيـــــــاده
وورود خدك لايطول شحبهـــــــا
والولو اللــــي وسط فمك قـــلاده
لاتحرقه جمر الشفاة ولهبهـــــــا
أنا غريب وبسمتك هي بـــــلاده
ولانـي وحيد الله ماكثر شعبهــــا
وأصغر حقوق الناس عند القياده
تطلب وتلقى من يحقق طلبهـــــا
عبدالمحسن بن عطية