[شذى الريحان]

[CELL="filter:;"]



دخلت على الجدة في غرفتها لقيتها غاطسة بين عفشها وعدتها





ماسكة راديها القديم وتقلب من محطة لمحطة ومن اذاعة لاذاعة
يمكن تسمع شي يعيد لها ذكريات زمان وتنهيدات زمان




ياقلبي عليكي ياجدة



قلت لها ياجدة عندي قصيدة موووعتبرة وعليها القيمة
للشاعر عبدالله دبلول الله يشفيييه ويعافيييه

تــــــــــــــــــــــقول





في بيت العيلة كان في سطوح ... و فَسَحَة حلوه ترد الروح
ياما تلمينا فيها بصفا نية و قلب مشروح
قليلنا كان يكفينا ... لقمة حلوه وهنية
اوقية جبنة تعشينا و فتوتة و حبة مقلية
و غدانا _ هههه _ غدانا كان المتيسر
... اي معرق و رز و خلاص
و امي تكسر و تجبر عشان نجيب لحمة راس ...
ونحمد ربنا ع الموجود
و نشكر فضلو على النعمة
و مع انو الخير كان محدود
... بس كل حاجة كانت
طعمة .. و كانت نفسنا قنعانا ... رغم الحرمان و القلة




و كانت عيننا مليانة و كنا مخلينها فلة
الفرش حمبل و خزانة ... مع كدا كنا بنتسلى
و الموجب كان الفاصل ... عرف سايد بين الناس




... و مهو مكتوب الحاصل
لا في دفتر و لا قرطاس ...
بس ناس كانت تتمعنى فيه عييييب و ما يسير و فضيحة
و كل حركة و لها معنى و سين بين حلوة و قبيحة

و في العصرية يا سلالام ... الله يردلنا الايام
هادي تكنس في الدرجان ... و هادي تنظف عفش البيت




ستيتة عليها القهوة الحلوة ... و امي تقلي كرنبو في زيت




و اما عمة تلاقيها بتسويلنا في الشوربيت






وجدة _ اللـــه يرحم جدة _ كانت فعلا سلوتنا



كانت زي اجمل وردة ... مين في الكون زي جدتنا
كانت في البيت هي النجدة ... و ياما ورا ظهرها دستنا ... و تقرع ابويا و تردو
بغضبها لو انو ضربنا ... و من يدها كنا بنتغدى
و ياما و ياما حكتنا ... احلى حكايات في الدنيا هي حكايات جدتنا
كانت تصحى من النجمة ... قبل ما يفج النور



عشان تحضر لنا لقمة و تجمعنا على تبسي فطور



و تصبحنا بدي الكلمة ... يجعل يومك هنا و سرور
و تصحي ابويا تقوله قوم يا ضنايا يا لغالي يا عمري
... صلي ركعة و سيب النوم
و ابدا على رزقك اجري
... انا ادري انو الرزق مقسوم بس البركة من بدري

كان يوم زمان مليااااان نشاط و فعالية و حركة
و يوم يبدا بالقران لابد يتملى بركة




و تعالوا نشوف كيف كانوا من يوم الناس ما تصبح
الواحد يفتح دكانو ... يا فتاح و يسبح ...




و اول ما يهز ميزانو و لو بقرش يستربح
يقولك خلاص انا استفتحت روح خلي جاري يستفتح




تجي مثلا للفوال شايل معاك الزبدية تبغى فول بربع ريال و تقولوا اتوصى فيا
و تلاقي جمبك رجال ياخدها يمليلوا هي ..
بنفس القيمة و راس المال و يزيدو السمنة هدية
تقولوا ليه يا عمي جلال تديلوا كتير و انا شوية
يرد عليك باحلى مقال تسمعوا كدا ع الصبحية
ياولدي ... يا ولدي هادا ابو عيال و قليلة عندو المادية ...
دا راجل مستور الحال
و عيالوا يملوا تكية ... و الواحد لو حالوا مال لازم يحس بالاخوية
كلام حكم ... كلام امثال ... و السنة حلوة و طرية



[/CELL][/TABLETEXT][/ALIGN]


علشان طلبكم كمان حلقة حجازية
صباحكم فل مزهر




توضيح لبعض الكلمات

ستيتة * الاخت الكبيرة
كرنبو اللي هو المنفوش في منو اشكال وانواع وبالحمر ياسلام

فتوتة نوع من انواع العيش قصدي الخبز يقرب للشوووريك المدور
لكن من غير دائرة كبيرة في النص

القهوة الحلوة ) انا مدمنتها واتقنها كمان
تقريبا زي المهلبية لكن اخف
ونحط معاها لوز مسلوق و مقشر
تقريبا تشبه السحلب