[عبدالله الحديبي]

يا نسمة الشرقي عن الصدر توبي
ما عاد فيني حيل لاشواق و براد

اقلام كفي في دفاتر جيوبي
قصة حنين و شوق ل احباب و بلاد

والكوت ما دفّا حنين الجنوبي
في كل رعشة كف للحزن ميلاد

اعاين الساعه ب وقت الغروبي
واضرب على صدر الثواني ولا فاد

مشتاق وعيوني جواب ل شحوبي
والشوق خذ منها مظاليل و رقاد

للديرة اللي غازلتها النصوب
و شوف اهلها في داخل ضلوعي فواد

ينبض غلا لامنهم رحبوا بي
وان غبت شفني للهواجيس منقاد

عقيم فرحة لابعدت بي دروبي
عن ديرة فيها هلي ربع و اجداد

ولاجا هواها بين صدري و ثوبي
رزق عقيم الفرحة دموع و اولاد

شهرين غيبة ! ي المقادير طوبي
وش عاد باقي ي المقادير وش عاد

قالوا لي : الجوال يقضي طلوبي
والصوت يكفي عن مسافات و شداد

و اقول وعيوني تعاين قروبي :
رسايل الوتساب ما حولها زاد

زاد القلوب احبابي تكون صوبي
واشبع لقا واعطي سواليف و ازداد

في ليلة والصبح دوبه و دوبي
والشاهي الحالي على جمر براد

وبرد الشتا خذ من ضلوعي شبوبي
والشوق والغربة تزيد التوقاد

خذيت لي رشفة من شفاه كوبي
وطرالي اللي شوفها بسمة اعياد

يا حلو سكر كاستي لا تذوبي
مالك مع زين الغنادير مقعاد

ماهيب من يتراقصن وسط لوبي
شيخة عرب واجدادها شيوخ واسياد

الله عطاها زين مابه عيوبي
والله يعطي والمخاليق حساد

لو وزعت دمها على هل ثيوبي
كان الحلا والزين باثيوبيا زاد

وعيونها الثنتين سبة ذنوبي
تذبحني محرم وتعتقني جٓماد

بسم الله اليا منهم صبحوا بي
واعوذ بالله لا غدوا عني بعاد

ولامن مشت في درب عكس الهبوبي
ادخل على الله من تقاسيم الانهاد

والله يلوم اللي يلوم العزوبي
لا باح مكنونه وزاد التنهاد

والله يعينك يا كفوف العزوبي
في كل رعشة كف للحزن ميلاد

عبدالله الحديبي
9/4/1436