[بندر الخزمري]

من عرفتـك وانتـي ايامـك عجـــــــاف
ما عطيـتي الحـب ولا كنتـي ســخـــيه

والحـقيـقه وبصـراحـه .. باعـتــــــراف
ما لقـيـت في خـاطـري لك قـابلـــــيه

كنـت احبـك لكـن امـثـالك يعــــــــاف
امـتـهـانك للـكرامـه عنـجـهـــــــــــيه

ان زرعتي الشوك فالشوك القطـــاف
فاهـمتـني صح .. ادري بك ذكــــــيه

ياحـياة الامس من يسـلم يخــــــــــاف
ولا تـداس الارض لو كـانـت طـــــــريه

واللي يعشق الف مـره باحتـــــــراف
يعشقك فالصبح .. ينساك بعــــــشيه

والبـحر جــاري ولا لـه اللتــــــــفاف
من يجاري البــحر وامـواجه عتـــــيه

البـحر يعـطي ولا هــابه جفـــــــاف
لكن انتـي منتـي اهـلٍ للعطـــــــــيه

باختـصار بكلمتـينٍ لك خفـــــــــاف
حب ماضي وانتهى.. جته المـــــــنيه