[الفقير الي ربه]

يقول الشاعر /

ياقبر قلّي عن زمـــان الإقامـــــه
كم عام يقدر ينتقل منـك راعـــــيك
ودّي توضّح لي شروط السلامـــه
من ضمّتك من ظلمتـــك من بلاويك

رد القبر /

ياذيب من ينشد يثمّـــن كلامـــــه
راجع خطيّاتك وراجع حسانيـــك
تبقى بجوفي لين يــوم القيـــــامه
محدٍ يجي عندك ولا يتصل فيك

رد الشاعر /

وان كانت الأعمال خامه وخامـــه
منها ذهب صافي ومنها سراميك
ممكن تفيد المعـــــذره والنـــــدامه
بعد نزولي بالكفن في ضواحيــك

رد القبر /

فوقك إذا جات النصايب علامـــه
ثنتين توضع عند راسك ورجليك
ماعاد ينفعـك العتــب والملامـــــه
من حين روحك ترتفع عند باريك

رد الشاعر/

ياقبر ما دوّرت منْــك الكرامـــه
أرجو عفو ربي ولاني براجيك
اللي بـ يْديه الأمر ماسك زمامــه
رب الملوك ورب كـل المماليـــــك

رد القبر/

ياذيب في هذا التحدي غشامــه
بلا عمل ماهو مناسب تحدّيـــــك
أوصيك عهد الله صون إلتـــزامه
منّي ومن بعدي من النار ينجيك

رد الشاعر/

ياقبر زوّدت المخـــاوف جسامـــــه
زدني نصايح نافعه قبل ما جيـــك
أخاف أجي لك فوق ظهري غرامه
وتسديدها ما يقبل الدفع بالشــيك

رد القبر /

إقرأ كتاب الله وافهــــم نظامـــــه
وتلقى الذي يعني لغيرك ويعنيـــك
واختار ما يعنيك وامسك خطامـــه
ما دمت حي ، خطام الأعمال بيديك
------------------
مشاركة همس الذكريات / بلخزمر