[بن حكمان]

اللين ما سود وجوه المطاليق
وعقد الحواجب ما رفع مستواها
والكبر ما ركد عقول المطافيق
والحقد ما حامى العرب واحتماها
والمال ما رد الظروف الملاحيق
واليد يقصر طولها من هفاها
واحذر كلام البهرجه والتلافيق
كلمة تجي تحت القدم"من خناها
والناس ما تقدر تسوق التوافيق
الله منع ناس ن وناس عطاها
واللي وصل حد الجبال الشواهيق
النفس لو تغتر يقصر مداها
واللي غفل قلبه بذنبه ولا فيق
روحه هو اللي فالمهالك رماها
واذا عطاك الله حب المخاليق
*افزع لربعك واستجب في دعاها*
وخلك على ما قيل في حزة الضيق
ضمن الرجال اللي يسرك لقاها
والعالم اللي شاطره بالمزاعيق
ماحد من العالم سلم من بلاها
يا كم قلوب ن ع المناصب مشافيق
بتروح وتخلي المناصب وراها
والحاجة اللي ساكنه بالمعاليق
الناس لا تدري بها وش خفاها
ماللنعامه في فضا الجو تحليق
دام الصقور محلقه في سماها
كم شئ تتمناه نفسك ولا سيق
الله كفى نفسك وعدى بلاها
ولو من حلا الدنيا تجر الطواريق
ترى الحياه لازم تصل منتهاها


نايف بن حكمان