[بن حكمان]

كسبت م الدنيا دروس وتجاريب
صحيح ما كل المعارف تجاره
ما ودي آقول ان تقدّمت بالطيب
معْرفْتي ببعض الاوادم خساره
المرجله ماهي بطول الاشاريب
الطيب في روس الكرم والجساره
احْداً خلقه الله مثل المراقيب
ظلٍ لربعه منصفٍ في قراره
واحْداً مسلمّ نفسه العار والعيب
تقدّمه يمناه و الا يساره
واحْداً ورَد بالطيب جمّ المشاريب
واحْدا محبٍ للفلس والبثاره
واحْداً مشيّخ صحبته بالاكاذيب
واحْداً من بيوت الشرف والاماره
واحْداً تراحيبه تسّر الاجانيب
ما تنطفى بالجود للضيف ناره
واحْداً بلا مقدار ، لو ماهو الشيب
رخيص ما يرفعه ردّ اعتباره
واحْداً حزامك في نهار الانآشيب
ان جيت في مكتبه والا ب داره
واحْداً شجيع ولا حسب للاذانيب
قدّم علومه لين نال الصداره
واحْداً خساره فيه كبر المناصيب
ما قد نفع عانيه والا ابن جاره
وبيوت معموره على الجود والطيب
الله جعلها للمكارم مناره
خل البيوت الا بليّا مواجيب
لو طّولوا بنيانها بالحجاره
ان كان ما فيها رحابه وترحيب
ان رحْتها معزوم تحسب خساره
واللي كسبته من كثير التجاريب
بعض المعارف ما تسمّى تجاره

نايف بن حكمان،،،