[بن حكمان]

خذني معك من وين مارحت واقفيت
الارض من دونك كئيبه حزينه

تركتني واقفيت عني وشدّيت
وأحزنت من بعدك ضمير ومدينه

تصّدق اني بعد ما رحت حنّيت
واشتقت للحب القديم وسنينه

لا عادها الله ساعةٍ يوم حبيت
بأسبابه الخافق تزايد ونينه

تعبت: كم ناديت مره، وصديت
روحي معك شفها بكفّك رهينه

ما يوم جيت ولا عشاني تعنيّت
وطعنتني طعنه بسلّه سنينه

وانا مع هذا صبرت وتسلّيت
والقهر ذي يمناي؛ تمسك يمينه

وش فيك كنك من هوا البال مليت
وينك؟وحبكّ بعد ذا الصد وينه ؟

شراك قلبٍ ما يبيعك ولا اشريت
وسكنت قلبّ ما تناقص حنينه

جرحك قصيده تنّظم بيت من بيت
وقصيدةٍ من جرح هذي لعينه

الشوق اذا جابك حبيبي :شف البيت
صاحبك بيقلّطك في وسط عينه