[بن حكمان]

الاولويه في الدنيا لـ اذل الرجال
والافضليه كسبها كل عقلٍ ردي
خلك وانا اخوك بين الناس راعي حِيال
اليوم مافيه ذا طيّب وهذا اجودي
اذا فتحنا لباب الشهره اصغر مجال
يجيك خطْل الفعايل في خطاه يْعدي
اكبر دليل لصغير العقل واقرب مثال
في ناقص العقل مثله بالفعل يقتدي
الناس تحتاج من قلبك فقط وسع بال
عشان تضحك عليها كل ما تبتدي
محال ..يتقدمون اهل الرخامه.. محال
لكنهم يلعبون العابهم يا بْعدي
ما هم في كفوفنا مثل السيوف السلال
هم مسرحيه نشاهدها على الموعدي
عشان نضحك ونتخّيل وقوع الخيال
هذا الخيال البعيد المضحك السرمدي
مصير الايام تكشف لك وجوه الرجال
يبان فيها الكفو ويبان فيها الردي