[شذى الريحان]

طلبت من الجدة تتكلم معايا ولا تحكييني اي حكاية
رغم انها مصدعة ووجعانة








وبعد الحاح وبوووسة راس
رضيت تسمعني كم حكاية

قالت يابنت ياشذى شكلي قربت اموت
قلت بعد الشر عنك يارب حسسك يطووول في الدنيا
قالت ااااه يطووول
الراس شاب والسن ذاب ومثوانا للتراب والله يابنتي انا صرت لاااانطح ولا اااقول اُمباع







وهااااااادي الحكاية
انبعة= اربعة


كان يا ما كان في قديم الزمان وسالف العصر والأوان ,
كان في واحد رجّال إسمه أسامة بخيل جداً وبنص لسان
يأكل الحروف ويا دوب ينعرف منه الكلام ,( الدغ )
وكان ما يجيب الإ القليل من مقاضي البيت ولا يجيب الشي
على قول المثل ( حتى ينشف الريق ويعمي الطريق )
وفي شهر الحج فرحت زوجته زكية


وقالت : أكيد أُسامة يوم النحر يوم عيد المسلمين يجيب خروف وينحره ويضحي زيّ المسلمين .
إللي له كم سنة لا ذبح ولا يعرفو طعم اللحمة منه كيف ؟.
ولا تأكلها إلا إذا راحت اتغدت عند أهلها,



وفي الأخير جر أسامه نفسه جر وراح على سوق الخرفان
وبغي يموت أو تجي له صرعه وهو يسمع أسعار الطليان .
ورجع وهو يتعكز على الجدران جاته حمى من غلو الأسعار .
مر على واحد يبيع رجول الطليان ومن بخله ولؤمه يا دوب خرج القرشين واشترى بيها الرّجول .
أخذ أربعّة في كيس ورجع على بيته .
قامت زكية سنت السكاكين والسواطير . وعبت التباسي والقدور .
وانفجعت بدخلته عليّها بكيس الرّجول . قالت يا مصيبتك بدل الخروف داخل عليااااا برّجول ؟ !
قال لها : أتمعي ياحلمة أُتيحيها مدادم) أنا تعبان ومسحن من إنتفاع الأسعان

الترجمة
(اسمعي ياحرمة أطبخيها مقادم أنا تعبان و مسخن من إرتفاع الأسعار )
وارتفعت درجة الحرارة عنده وصار جسمه نيران .



قالت ( يا رب نومة بلا قومة ) حسبي الله عليك من رجّال ما تفرحنا حتى مع أيام فرح المسلمين ,
خصرها وخرج وسابها تبربّر وتندب حظها .
قامت زكية وطبخت المقادم الأربّعة وظبطتها وسوت سلطة بالثوم والكزبرة وفتت العيش
وسقسقته بالمسلوقة وهي بتسوي أكلها ,
جاعت ومرمشت وحدة من المقادم ورمت الزبالة بعيد عن البيت .
عبت زكية السفرة وصحت أسامة على الغدى ,
وجلس على السفرة وريحة الكشنة تخرق الخُشم وتطلع مع النخاشيش .
جلسوا على السفرة ويا دوب حطت زكية أول لقمة في فمها
قال : ودفي هادي تناته مدادم فين الأنبعة ( وقفي هادي ثلاثة مقادم فين الأربعة )
قالت : إنت جبت ثلاثة مو أربعة



قال : لا أنبعة4
كذبته زكية وقالت : يا رجّال .
قال : أنبعة يعني أنبعة
صاح أوسامة وناح وساب الأكل وقام قوام , وراح على غرفته زعلان لا أكل ولا شربّ
ليله كاملة بالتمام . أكلت زكية وشربت وخصرته قيد قلبها عليه مليان .
راحت عليّه ثاني يوم لقته فوق فراشه نايم غضبان .
قالت له : قوم كُل وأشربّ لك يومين وإنت على هذا الحال ,
قال أسامة : أنبعة !!!
قالت له : ثلاثة . دار وجه على الجدار وخسرها ونام
وهو يقول : أنبعة يا بنت الكنب (الكلب ) أنبعة ,
تركته زكية وقامت سوت شغلها ونامت ,
وفي رابع يوم راحت معاها أكل وموية قالت له : قوم بُل ريقك , ريقك نشف راح تموت .


فتح عينه ويا دوب نطق ( أنبعة ) وغمض عينه .
شارف أسامة على الموت . تركته زكية و قالت : الله لا يردك .
وقامت سوت شغلها وفي العصر جات لقته لا يضرب بيد ولا برجل
نادت زكية أهل الحارة شافوه قالوا : هذا بيطلع في الروح .
طلبت زكية منهم تودعه لآخر مرة جات عند رآسه
وقالت : ثلاثة مقادم . يادوب رفع اصابيعه الأربعة ورخاها ومات .
قالت مع السلامة خذوه . قاموا غسلوه وكفنوه وأخذوه وصلوا عليه ودفنوه .
طلعت روح أسامة وهو رافع اصابيعه الأربعة من بخله يا لطيف .
وبعد ما دفنوه فكت زكية السحارة ( صندوق ) لقيت فيه خير كثير ومال وفير ,
وصارت تشتري وتأكل وتتصدق على الفقراء .
أتزوجت زكية بعد مدة واحد ثاني , إسمه هلال
وعاشت باقي عمرها مبسوطة في سعادة بعيدة عن البخل والبخلاءـ